«Astana LRT» JShS tólem júiesi departamenti direktory Dáýren Nuráliev Astanadaǵy qoǵamdyq kólik kartalarynan eki ret tólem alynbaitynyn aityp, sózi dáleldi bolý úshin tólem qabyldaityn validatorǵa kartochkasyn basyp kórsetti, dep habarlaidy QazAqparat tilshisi.
«Eki ret tólemniń alynǵany týraly, bir avtobýstan ekinshisine otyrǵan kezde tólemniń ekinshi ret alynbaý ádisiniń jumys istemeitini jaily osyǵan deiin kóp aitylǵan bolatyn. Eki ret tólemniń alynýy týraly máseleniń bolýy múmkin emes. Sebebi, bul - biryńǵai júie. Barlyq qurylǵy bir júie boiynsha jumys isteidi», - dedi Dáýren Nuráliev kompaniiada ótken dóńgelek ústel barysynda.
Dáýren Nuráliev dálel retinde dóńgelek ústel barysynda tólem qabyldaityn apparatqa óz kartasyn basyp kórsetip, eki ret tólemniń alynbaityndyǵyn kórsetti.
Eske sala ketsek, Adam quqyqtary jónindegi ulttyq ortalyq qoǵamdyq kólikterge tekserý júrgizip, onyń qorytyndysyn jariialaǵan bolatyn. QR Adam quqyqtary jónindegi ýákil Asqar Shákirov «validatorlardyń eki ret jolaqy alady» degen turǵyndardyń kúdiginiń rastalǵanyn aitqan edi.
Al onyń aldynda jolaýshylar aldyńǵy esikten kirgendegi validator 180 teńge, al avtobýstardyń basqa validatorlary 90 teńge alatynyn aityp aryzdanǵan edi. Keiin «Astana LRT» ókilderi «kólik kartalarynan eki ret tólem alynýy múmkin emes» dep jaýap bergen bolatyn.
