Prokýror "Astana LRT" jobasy boiynsha aiyptalǵandardy 7-11 jylǵa bas bostandyǵynan aiyrýdy surady. Bul týraly jergilikti BAQ habarlady. "Eldegi jemqorlyqtyń kórinisi" dep atalǵan is boiynsha sot protsesi byltyr kúzde Nur-Sultannyń qylmystyq ister jónindegi mamandandyrylǵan aýdanaralyq sotynda qarala bastaǵan edi. Biyl sáýir aiynda is aiaqtalýǵa jaqyn qalǵanda birqatar jaittardy anyqtaý úshin qaita sozyldy, dep jazady Azattyq.
Iste 7 aiyptalýshy bar. Olarǵa "uiymdasqan top qurý jáne oǵan jetekshilik etý" jáne "ózine senip tapsyrylǵan múlikti iemdený jáne jumsaý" baptary boiynsha aiyptar taǵylǵan.
Dúisenbi kúngi jaryssózde memlekettik aiyptaýshy sottan jeteýin de kináli dep tanyp, túrme jazasyn berýdi surady. Atap aitqanda:
- Nur-Sultan qalasynyń jolaýshylar kóligi jáne avtomobil joldary basqarmasynyń burynǵy jetekshisi Rashid Amanjolovqa – 11 jyl taǵaiyndaýdy, qaýipsizdigi joǵary túzetý mekemesine jiberý;
- Nur-Sultan qalalyq máslihatynyń hatshysy, burynǵy depýtat Janat Nurpeiisovke – 9 jyl, múlkin tárkilep, qaýipsizdigi joǵary túzetý mekemesine jiberý;
- Astana Innovations kompaniiasy basqarmasynyń burynǵy tóraǵasy Talǵat Áshimge – 8 jyl, múlkin tárkilep, qaýipsizdigi ortasha mekemege jiberý;
- Enshiles kompaniia ókili Ulyqbek Achilovqa – 11 jyl, múlkin tárkilep, qaýipsizdigi ortasha mekemege jiberý;
- Enshiles kompaniia ókili Timýr Qasabaevqa – 8 jyl, múlkin tárkilep, qaýipsizdigi ortasha mekemege jiberý;
- Enshiles kompaniia ókili Dýlat Músenovke – 7 jyl, múlkin tárkilep, qaýipsizdigi ortasha mekemege jiberý;
- Enshiles kompaniia ókili Dáýren Ábdihamitovke – 11 jyl, múlkin tárkilep, qaýipsizdigi ortasha mekemege jiberýdi suraǵan.
Aiyptalýshylardyń advokattary aiyptaý jaǵy "isti ústirt júrgizdi" dep sanaidy.
Osyǵan deiin isti tergegen jemqorlyqpen kúres is-qimyl agenttigi "aqsha jymqyrý shemasyn Nur-Sultan qalasy ákiminiń burynǵy orynbasary Qanat Sultanbekov, "Astana LRT" kompaniiasynyń burynǵy basshysy Talǵat Ardan uiymdastyrǵan" dep málimdegen edi. Olarǵa halyqaralyq izdeý jariialanǵan.
Tergeý organdarynyń málimetinshe, sheneýnikter kásipkerlermen birge joba qunyn jasandy túrde qymbattatyp, jalǵan kásiporyndardyń kómegimen milliard teńgeni qaǵaz aqshaǵa ainaldyrǵan.
LRT jobasynyń tiimdiligi jaily másele Qytaidan investitsiia tartylyp, qurylysy bastalǵan sátten (2017 jyl) beri jii aitylyp keledi. Qazaqstandaǵy alǵashqy jeńil relsti transport júiesi astananyń sol jaǵalaýynan áýejai jáne temir jol vokzalyna deiin jolaýshylar tasymaldaýy tiis bolǵan.
2019 jyly jazda premer-ministrdiń birinshi orynbasary, qarjy ministri Álihan Smailov LRT jobasyn júzege asyrý úshin Qazaqstannyń Qytaidyń damý memlekettik bankinen 1,5 mlrd dollar kóleminde qaryz alǵanyn habarlaǵan, onyń 344 mln dollary qurylysqa jaratylyp qoiǵan.
Biraq Qytai banki merdigerlerge qatysy bar problemaǵa bailanysty qarjylandyrýdy toqtatyp, aqyry úkimet qurylysty aiaqtaý úshin qarjy bóletinin aitqan.
Prezident Qasym-Jomart Toqaev 2019 jyly kúzde jobany ashyq synap, "daýly joba" dep ataǵan.
Degenmen astana biligi keiinirek LRT qurylysyn jalǵastyra beretinin habarlady. Stantsiialar men jerasty jaiaý júrginshiler ótkeli qysqarady.
QazTAG-tyń jazýynsha, "Astana LRT" JShS jemqorlyq daýynan keiin City Transportation Systems (CTS) bolyp ózgertilgen.
