Qazaqstannyń ulttyq ekonomika ministrligi Qyrǵyzstanǵa 100 million dollar kómek qarjy bólý týraly kelisimniń kúshin joiatyn zań jobasyn daiyndady. Jergilikti BAQ-tyń habarlaýynsha, qujat parlament májilisine jiberilmek. Kómek qarjy Qyrǵyzstannyń Eýraziia ekonomikalyq odaǵymen (EAEO) integratsiialanýy úshin beriletin bolǵan, dep jazady Azattyq.
9 qarashada Qyrǵyzstan parlamenti Qazaqstannan 10 million dollar kómek alý týraly kelisimniń kúshin joiýdy maquldaǵan.
Qazaqstan men Qyrǵyzstan úkimetteri arasyndaǵy ekonomikalyq integratsiia jaǵdaiynda ekonomikalyq yntymaqtastyqty damytý týraly kelisimge 2016 jyldyń 26 jeltoqsanynda Sankt-Peterbýrgtegi Joǵary Eýraziia ekonomikalyq keńesiniń jiynynda qol qoiylyp, biyl shildede Qazaqstanda ratifikatsiialanǵan.
Qazaqstan syrtqy ister ministrligi 24 qazanda Qyrǵyzstan Astanany atalǵan kelisimniń kúshin joiý protsesin bastaǵanyn eskertkenin habarlaǵan. Bishkek Qyrǵyzstannyń Qazaqstan qarjysyn alýǵa múddeli emesin málimdegen.
Qyrǵyzstan Qazaqstan kómeginen eki el arasyndaǵy qarym-qatynas nasharlai bastaǵan soń bas tartyp otyr. Qazaqstan 10 qazannan bastap Qyrǵyzstanmen shekaradaǵy tekserýdi kúsheitip, onyń saldarynan shekarada uzyn-sonar kezek paida bolǵan. Astana shekaradaǵy tekserýdi kúsheitýdi "Qyrǵyzstannan keletin kontrabandamen kúres" dep túsindirgen. Bishkek bolsa Qazaqstan jaǵy shekarada "qoldan kedergi jasap otyrǵanyn" aitady.
