Senat depýtaty Aqmaral Álnazarova Astana kúni men Tuńǵysh Prezident kúnine qatysty óz pikirin bildirdi, dep habarlaidy QazAqparat.
Parlament palatalarynyń birlesken otyrysynan keiin tilshiler depýtatqa "Astana kúnin ózgertý qajet pe" degen suraq qoidy.
«Qandai jaǵdai bolsa da, bizge Astana kúni qajet. Nege qaita qaramasqa dep oilaimyn. Múmkin, Elorda kúnin qaita qarap, qandai da bir tarihi datalarǵa tikelei bailanystyrý bolashaqtyń isi shyǵar», - dedi Aqmaral Álnazarova.
Sondai-aq jýrnalister 1 jeltoqsan – Tuńǵysh Prezident kúnin merekeleýge qatysty da oiyn surady.
«Biz elimizdiń demokratiialyq damý jolyn tańdadyq, osy jolda júrýimiz kerek (...) Bul másele sheshiletin bolady (1 jeltoqsandy merekeleý – red.), bálkim mereke qaita formattalýy múmkin», - dedi senator.
