Qazaqstan ishki ister ministrligi tótenshe jaǵdailar komitetiniń resmi ókili Rýslan Imanqulov Qyrǵyzstannyń Talas oblysynda ornalasqan Kirov sý qoimasynda jóndeý júrgiziletini týraly Qazaqstanǵa aldyn ala eskertkilgenin málimdedi.
Tengrinews.kz aqparattyq saitynyń habarlaýynsha, Imanqulov sonymen qatar Qazaqstannyń sý qoimasynan jiberiletin qosymsha sýdy tosyp alýǵa daiar ekenin de aitty. "Qazaqstannyń kezekshi qyzmetteri daiyn otyr. Ázirge sý jiberilgen joq. Sý búgin jiberiledi dep josparlanǵan. Qyrǵyzstannyń tótenshe jaǵdailar ministrligi ýaqytyn qosymsha habarlaidy. Biz olardyń kezekshiler qyzmetterimen bailanysyp otyrmyz" dedi komitet ókili.
Shý-Talas basseini inspektsiiasynyń málimetinshe, qazir Kirov sý qoimasyna 19 million tekshe metr sý jinalǵan. Qoimanyń syiymdylyǵy 550 million tekshe met. Qyrǵyzstan biligi keshe 18 qazanda sý qoimasynyń bógetterin jóndeý úshin sýdy tolyǵymen jiberetinin habarlaǵan.
Sý qoimasy Talas oblysynyń Manas jáne Kara-Býýra aýdandarynyń arasynda, Qazaqstanmen shekaradan ondaǵan kilometrde ornalasqan.
Qoimadaǵy sýdyń 12 paiyzyn ǵana Qyrǵyzstan, al qalǵanyn Qazaqstan paidalanyp kelgen. Qyrǵyzstandaǵy bul qoima 1975 jyly salynǵan.
Sý qoimasynyń jóndeý jumystary Qazaqstan men Qyrǵyzstan shekarasynda týyndaǵan máselemen tuspa-tus keldi.
