Dýbaida jetinshi Dúniejúzilik úkimettik sammit (WGS 2019) aiasynda Astana memlekettik qyzmet haby Basqarýshy komitet tóraǵasy Álihan Baimenov Birikken Arab Ámirlikteri ministrler kabineti isteri jónindegi ministr, WGS Tóraǵasy Mýhammed ál-Gergavimen kezdesti, dep habarlaidy "Ult aqparat" Astana habynyń baspasóz qyzmetine silteme jasap.
«Bizdiń kózqarasymyz ben maqsatymyz ortaq, bul - adamdardyń ómir sapasyn arttyrý. Osy turǵyda BAÁ úkimeti Astana haby qatysýshy-elderimen memlekettik sektorda innovatsiialardy qoldaný salasyndaǵy ozyq tájiribemen bólisýge ázir», - dep atap ótti kezdesý barysynda Mýhammed ál-Gergavi.
Óz kezeginde Álihan Baimenov memlekettik qyzmettegi innovatsiialardy damytýdaǵy áriptestiktiń mańyzyna toqtaldy. Ol Habqa 40 memleket, onyń ishinde jańa tehnologiialar men elektrondy úkimet salasyndaǵy kóshbasshylar - Estoniia men Koreia qatysatynyn jetkizdi. Hab tuǵyrnamasynda ózara tájiribe ári bilim almasý maqsatynda memlekettik qyzmet kórsetý men elektrondy úkimet boiynsha praktikterdiń eki Aliansy qurylǵan. Sonymen qatar, Álihan Baimenov BAÁ-niń memlekettik innovatsiialar boiynsha mol tájiribesi qatysýshy-elder úshin qundy bolatyndyǵyn atap ótti.
Taraptar aldaǵy yntymaqtastyqty, onyń ishinde memlekettik innovatsiialar salasynda birlesken halyqaralyq is-sharalar ótkizip, zertteýler jasaý máselelerin talqylady. Ál -Gergavi Astana habyna dúniejúzilik sammit jumysyna jyl saiyn memlekettik qyzmet boiynsha parallel sessiialar uiymdastyrýshysy retinde at salysýǵa usynys bildirdi.
Eske sala keteiik, búgin Dýbaida Dúniejúzilik sammit ashyldy. Bul álemniń 150-den astam memleketinen 3 myńnan astam adam qatysatyn iri ǵalamdyq tuǵyrnama bolyp otyr. Onda memlekettik joǵary laýazym ieleri, kásipkerler, sarapshylar memlekettik organdar jumysyn jaqsartý boiynsha tájiribe almasyp, keleshektegi úkimetter týraly óz kózqarastarymen bólisedi.
