Elordada eki kúnnen beri qar tolastamai jaýyp jatyr. Qala turǵyndary aýlada kólik iterip, qalyń qardy ombylap júr. Al kommýnaldyq qyzmetter kóshelerdi tazalap úlgermei jatyr, dep jazady Sputnik Qazaqstan.
Tótenshe jaǵdailar departamenti halyqty barynsha saq bolýǵa shaqyrdy. Sebebi keshegi aýa-raiy áli saqtalady. Qazgidromettiń málimetine sáikes, 25 qarasha kúni burqasyn men kóktaiǵaq bolady.
Al Nur-Sultan politsiia departamenti kólik júrgizýshilerin jol erejesin saqtaýǵa jáne kólikti kósheniń boiyna qaldyrmaýǵa úndedi. Sebebi kommýnaldyq qyzmetter kúsheitilgen rejimde jumys istep jatyr.
Aýa-raiynyń qolaisyzdyǵynan astanada bir táýliktiń ishinde júzdegen jol oqiǵasy tirkeldi.
Tótenshe jaǵdailar departamentiniń azamattyq qorǵanys basqarmasynyń bastyǵy Ratbek Demeýbergenniń aitýynsha, búginde qysqy ýaqytta tótenshe jaǵdaiǵa qarsy azamattyq qorǵanys kúshteri men quraldarynyń toby jasaqtaldy. Oǵan 704 adam men 462 tehnika kiredi.
Qala ákimdigi qar tazalaý jumystarynyń táýlik boiy eki aýysymda júrgizilip jatqanyn málimdedi.
Túnde qalyń qardyń saldarynan áýejai ýaqytsha jabyldy. Ushý-qoný jolaǵyn tazalaýǵa týra keldi. Aýa-raiynyń qolaisyzdyǵynan 12 reistiń ýaqyty keiinge shegerildi. Al astanaǵa ushyp kelgen 9 reisti qosalqy aerodromǵa qondyrdy.
Qalada avtobýstar qatynasy da kidirip qaldy. Tańerteń aialdamada biraz adam jinaldy. Aýlada turǵan keibir kólik qardan shyǵa almai qaldy. Adamdar bir-birine kómektesip, kólik iterdi. Al taksi qyzmetiniń baǵasy sharyqtap ketti.
Nur-Sultan ákimdigi usynǵan aqparatqa sáikes, qazirgi kezde qardy tazalaý jumystaryna 1 300 arnaiy tehnika men 1 900 adam jumyldyryldy.
