Astana – Alashtyń asqaq bedeli, Táýelsiz Qazaqstannyń tarihyndaǵy qol jetkizgen eń zor tabysy.
Ózin qazaqpyn, qazaqstandyqpyn dep sanaityn azamat úshin Astana – eń úlken maqtanysh!
Biyl qazan aiynyń 24-ti meniń elge oralǵanyma 20 jyl tolady. Sol ýaqyt aralyǵynda Astana kóz aldymda ósip, órkendedi. Meniń Uly Dala Elinde jasaǵan jáne Alla buiyryp, alda jasaityn barlyq ómirim Astanamen zamandas bolyp qala beredi.
Astanada turatyn adam ózine kádimgidei mindet, jaýapkershilik alýǵa tiisti. Sebebi, Astana – Uly Elimizdiń ákimshilik jáne saiasi otalyǵy. Biliktiń barlyq ushar basy Astanada turady. Al, bar qazaqtyń shyqqan jeri – aýyl! Bilikke qoly jetken ár qazaq aýylyn oilaýy, onyń kórkeiip, gúldenýi úshin ter tókkeni jón. Astanada turatyn men jáne menimen taǵdyrlas «arǵy betten» oralǵan qandastarym úshin Memleketimiz ben shette júrgen qazaqtardyń taǵdyry birdei – birinshi orynda turýǵa tiis! Qai ministrlikke kireiik, qai komitettiń esigin ashaiyq, jeke sharýany onynshy orynǵa ysyryp qoiyp, solardyń Atajurtyna oralýy, oralǵandarynyń ornyǵyp qalýy jaily aitýǵa mindettimiz! Basqa salada da solai. Shama-sharqymsha qandastarymnyń únin Aqorda men Úkimetke jetkizip kelem! Demek, bul jaǵynan alǵanda, ózim jurt betine túzý qarai alam! Astana meni betimnen qaqqan joq, sózimdi jerge tastaǵan emes. Kerektisin ilikke alyp, zańdastyryp keledi.
Sol úshin de, Astana, men saǵan rizamyn!
Adam balasy úshin eń qymbat qundylyq – Allanyń adam balasyna bergen azattyǵy men erkindigi!
Qudaiǵa táýbe, sol erkindik pen bostandyq meniń Otanym Qazaqstanda bar, jetkilikti! Jetispei jatqan jeri bolsa, aqyldy urpaq erteń jitildiredi, tolyqtyrady!
«Astana» degen sóz aityla bastaǵanda, aldymen oiǵa oralatyn, tilińe tiek bolatyn bir esim bar. Ol – Ult Kóshbasshysy Nursultan Nazarbaev!
Táýelsiz Qazaqstannyń, onyń Elordasy bolǵan Astananyń qurylýy, qalyptasýy, búgingi deńgeige jetýi osy esimmen – Nursultan Ábishulymen tikelei bailanysty! Arystan júrekti, qurysh jigerli, nur kelbetti Nuraǵa týǵan halqy men ózi bastap qurǵan Táýelsiz memleketi úshin búkil sanaly ǵumyry men aqyl-parasatyn arnap keledi!
Abylai men Álihannyń oryndai almai ketken asyl armanyn oryndaý mindeti ǵasyr toǵysynda Nursultan Ábishulyna júkteldi hám ol mindet, mine, tabysty oryndaldy. Biz sonyń kýágeri bolyp otyrmyz...
Dana qazaq «Jaqsylyqtyń erte-keshi joq!» deidi. Bizdiń qazaq – jomart halyq! Astananyń 20 jyldyǵyna arnalǵan búgingi saltanatty toida da sol keń-moldyǵyn kórsetip, ár oblys óz baiǵazysyn ákelip, «Esil» deitin erke sulý ózenniń eki óńirine qadap jatyr. Al, meniń baiǵazym bólekteý: ýaqyty men oraiy kelip tur, Astananyń atyn «Nursultan» dep ózgertý kerek!
Órkenietti ulttar mundai úrdisti baiaǵyda bastap keteken. Qudaiǵa táýbe, Táýelsizdiktiń arqasynda qazaq ta dúiege tanyldy, alpaýyt eldermen tize tiistirip qatar otyratyn, minbelerden birinshi bolyp sóz alyp, pkir aitatyn deńgeige jetti.
Erte me, kesh pe, báribir, «Astana» aty «Nursultan» bolyp ózgeredi!
Eger, osy 20 jyldyqtan bastap Astana «Nursultan» dep atalsa, bul – bizdiń naǵyz kóregen ult ekenimizdiń aiǵaǵy bolmaq. Ainalamyzdaǵy básekeles elderdiń qyzyǵa da, qyzǵana da qaraitynyna meniń senimim kámil. Oǵan bizdiń Elbasymyzdyń esimi, daý joq, tatidy, laiyq! Jáne osy sheshimi úshin qazaq eshkimnen uialmaidy!
N.Nazarbaevqa degen qurmet – Táýelsiz Qazaqstanǵa jasalǵan qurmet!
7-shildeden bastap meniń «Nursultan qalasynda» turǵym keledi!
Astana, 20 jyldyq toiyń qutty, ǵumyryń máńgilik bolsyn!!!
Aýyt Muqibek
05.07.2018
Astana
.jpg)