Elimizdiń bas qalasy Astana keleshekte Nursultan, Nazarbaev nemese Nazarbaev-Astana dep atalýy múmkin. Bul týraly búgin QR Parlamenti palatalarynyń birlesken otyrysynda «Táýelsizdiktiń 25 jyldyǵy Qazaqstan jetistikteriniń deklaratsiiasyn» qabyldaǵannan keiin Májilis depýtaty Qýanysh Sultanov aitty, dep habarlaidy QazAqparat.
«Bul máseleni biz áli aqyldasyp, keńesetin bolamyz. Nursultan, Nazarbaev, Nazarbaev-Astana dep te ataýǵa bolady. Bul halyqtyń usynysy. Biz ony búgingi deklaratsiiamyzda kórsettik, depýtattar qoldady. Másele osydan 5 jyl buryn elimizdiń táýelsizdiginiń 20 jyldyǵy atalyp ótken kezde de kóterilgen bolatyn. Oǵan Elbasynyń eńbegi bar. Osy Astana qala bolǵannan keiin ekonomikasy, turmysy qanshalyqty kóterilgenin bilemiz. Burynǵy eski qalada qanshama úidiń saz astynda qalǵanyn kóz kórgen adamdar jaqsy biledi. Qazirgi Astananyń ózi jer men kóktei. Burynǵy Tselinogradpen salystyrýǵa kelmeidi», - dedi Sultanov.
Depýtat qalanyń ataýyn ózgertý máselesin Qazaqstan Prezidentimen aqyldaspaǵandyqtaryn basa aitty. «Bul gúldenip kele jatqan elimizdiń bolashaǵy úshin qajet jáne oǵan Elbasynyń tolyqtai eńbegi bar. Osydan 5 jyl buryn Memleket basshysy mundai usynysty quptamaǵan edi. Osy joly taǵy da usynys berip otyrmyz», - dedi ol.
