Astana qalasy ákimdiginiń «NAZ» memlekettik bi teatry óziniń 25 jyldyq mereitoiyn atap ótti.
25 jyl – shirek ǵasyrlyq eńbek pen tabysty shyǵarmashylyq joldyń kórinisi. Osy jyldar ishinde ujym tek tanymaldyqqa ie bolyp qana qoiǵan joq, kórermenderdiń mahabbatyna bólenip, horeografiia áleminde óner men sulýlyqtyń shynaiy simvolyna ainaldy. Elimizde ǵana emes, shet memleketterge «Qazaq» degen myńjyldyq tarihy bar el bolǵanyn, kóne órkenieti men mádenieti bolǵanyn horeografiia tiliminen jetkizip júrgen biregei teatr.
1999 jyly filarmoniia janynan 4 bishi qyzdan shaǵyn ansambl retinde qurylǵan «Naz» teatry búginde 130-dan asa qyzmetkeri bar úlken óner ordasyna ainaldy. Astanamen túidei qurdas bolǵan teatr elordamyzdyń mádeni-rýhani damýyna zor úles qosyp, qalanyń mádeniet keńistiginde airyqsha oryn aldy.
Osy jyldar ishinde repertýarynyń san alýandyǵymen kórermenin tańqaldyryp, 200-den astam bi men horeografiialyq qoiylymdardy tartý etti. Spektaklderde klassikalyq baletten bastap zamanaýi bi baǵyttaryna deiingi janrlardyń ártúrliligin kórýge bolady. Teatrdyń horeograftary názik sezimdi beineleitin kórinisterden bastap tarihi-dramalyq shieleniske toly keń aýqymdy emotsiialardy jetkize alatyn horeografiialyq spektaklderdi sahnalady. Osyndai eleýli eńbekterdi elimizdiń mádenietine sińirgen “Naz” ansambliniń mereitoiy aýqymdy atap ótildi. Mereitoi aiasyndaǵy is-sharalar 4 bólimnen turdy.
Olardyń ishinde airyqsha atap ótetini. Qazaqstan Teatr qairatkerler Odaǵynyń múshesi, «Mádeniet salasynyń úzdigi», jýrnalist Tolqyn Sultannyń “«Naz» memlekettik bi teatry. 25 jyldyq beles” kitabynyń tusaýkeseri ótti.
Kitap, «Naz» memlekettik bi teatrynyń 25 jyldyq mereitoiyna arnap jazylǵan alǵashqy eńbek. Elimizdegi tuńǵysh bi teatrynyń qurylýy, qalyptasýy jáne jetistikteri, shyǵarmashylyq joly saralanyp, oqyrmanǵa usynylyp otyr. Kitaptyń bi óneri jaily aitar tanymdyq jáne taǵylymdyq máni zor. Bul eńbek óner zertteýshilerine, joǵary jáne orta arnaýly oqý oryndarynyń oqytýshylaryna, stýdentterge jáne ónersúier qaýymǵa arnalǵan. Sondai-aq, horeografiia salasynyń mamandarynyń teatr jaily oi-pikirleri jáne jalpy qazaq ulttyq bi ónerine degen paiymdy oilary baiandalady.
Tolqyn Sultan: «Osy kitapty jazsań» degen usynysqa bir jyl oilanyp, áreń kelistim. Kelispegen sebebim, az ýaqytta material jinap, ony qaǵazǵa túsirý, túsiný, qorytyndy shyǵarý ońai emes. Al kelisken sebebim, ózim qyzmet ete júrip, jan-dúnieńniń osy álemmen tutasyp, shabyt alyp, ártisterdiń jankeshtiligine tań qalyp, óz baǵasyn ala almaǵan kezderinde qarnyń ashyp, júregiń syzdaidy eken. Az bolsa da, osy teatrdyń damýyna óz úlesimdi qosyp, kózqarasymdy bildirgim keldi. Bul kitap ádebi kórkem shyǵarma emes. Munda naqty derekterge súiengen, osy teatrdyń qalyptasýyna yqpal etken azamattar men ártisterdiń estelikteri men pikirleri jan-jaqty áńgimelenedi. Qazaq óneriniń janashyry, ańyz adam, Ózbekáli Jánibekovtiń shekpeninen shyǵyp, tárbiesin kórgen, ónerdi shyn túsinip, baǵalai biletin bi óneriniń maitalmandary Qadisha, Erkebulan Aǵymbaevtardyń, Ó.Jánibekovten kórgen ulaǵatyn óz tájiribelerine arqaý etip, úlken ujym qurýy kezdeisoqtyq emes. Óz-aǵańnyń aty bekerge atalyp otyrǵan joq. Qazaq óneriniń, onyń ishinde, joǵalýǵa shaq qalǵan bi ónerine janashyrlyq tanytyp, 1985 jyly Almaty oblystyq atqarý komitetinde qyzmet atqaryp júrgen kezinde memleket jáne qoǵam qairatkeri, tarihshy-etnograf, ǵalym Ó.Jánibekovtiń tikelei qoldaýymen «Altynai» bi ansambli qurylǵan edi. Sol ansambldiń quramynda bolǵan erli-zaiypty Aǵymbaevtar Shara Jienqulova, Áýbákir Ysmailov, Dáýren Ábirov, Olga Vsevolodskaia-Golýshkevichtiń bi qoiǵan daryn kózimen kórip ósken. Qazaqstan Respýblikasynyń eńbek sińirgen ártisi Ǵaziza Ábdieva, Mádeniet qairatkeri Dana Myrzabekova, Úsen Maqanov pen Toiǵan Izim, Talǵat Qylyshbaev, Aigúl Qulbekovalarmen bir ujymda eńbek etip, bi óneriniń qainarynan tikelei sýsyndaǵan naǵyz mamandar. «Naz» memlekettik bi teatry – halyq biin tuńǵysh kásibi sahnaǵa shyǵarǵan Ysqaq Byjybaev, Shara Jienqulova, Áýbákir Ysmailov, Dáýren Ábirov syndy has sheberler ideiasynyń XXI ǵasyrda iske asyp, kemeldengen túri».
Kitaptyn tusaýkeser rásimin Qazaq KSR-ń Eńbek sińirgen ártisi», Qazaqstan Halyq ártisi Gúljan Izimqyzy Talpaqova, ekonomika ǵylymdarynyń doktory, professor, QR Diplomatiiasyna eńbegi sińgen qairatker «Naz» bi teatrynyń rýhani janashyry Sailaý Batyrshauly, QR Bilim berý isiniń qurmetti qyzmetkeri, QR Mádeniet úzdigi, Qazaq KSR halyq ártisi Shara Jienqulovanyń shákirti Ǵainikamal Nyǵmedjanqyzy Beisenova, Qazaq KSR-ń Eńbek sińirgen ártisi, ónertaný ǵylymdarynyń ǵylymdarynyń kandidaty, professor Toiǵan Ospanqyzy Izim, Astana qalasy ákimdigi «Naz» memlekettik bi teatrynyń direktory, QR Mádeniet qairatkeri, «Horeorgafiia óneriniń qairatkerler qoǵamy» tóraǵasy Erkebulan Aǵymbaev jasady.
