20 sáýirden bastap «Astana Balet» teatry «Eurasian Dance Festival» birlese otyryp, astanalyq teatr sahnasynda ótken halyqaralyq balet óneri festivaliniń aiasynda kórsetilgen spektaklder men gala-kontsertterdiń videojazbalaryn onlain-rejimde usynady, dep habarlaidy "Ult aqparat".
«Ártister men kórermenderdiń teatr zalyna qaita oralýyn kúte otyryp, Eýropa men Aziianyń aitýly teatrlary men bi ujymdary bizdiń sahnada kórsetken jarqyn qoiylymdarynyń beinejazbalarynyń arhivterin kórseteiik dep sheshtik. Úsh jyl ishinde, bul balet festivali Qazaqstannyń mádenietindegi eleń eterlik qubylysqa ainaldy. Kórermen qaýymdy osy qoiylymdarmen tanysýǵa ia bolmasa súiikti spektaklderin qaita tamashalaýǵa shaqyramyz», - dedi teatr basshylyǵy.
Kórermen qaýym álemdik klassika jaýharlary, halyq shyǵarmashylyǵy men qazirgi zamanǵy áigili horeograftardyń týyndylary túiisken festival jazbalaryn tamashalai alady.
Kórermenmen qaýyshýdyń jańa formaty Qazaqstan, Resei, Portýgaliia, Gollandiia jáne Germaniia ártisteri qatysqan juldyzdy gala-baletten bastalmaq. Alǵashqy onlain-kórsetilim 20 sáýirde, Nur-Sultan qalasynyń ýaqyty boiynsha saǵat 20:00-de «Astana Balet» teatrynyń resmi YouTube-arnasynda usynylady. Tikelei efirdi kórip úlgermegender spektakldi keiingi 24 saǵat ishinde tamashalai alady.
22 sáýir, saǵat 20:00-de áigili ispaniialyq bi triosy Castro Romero usynǵan «Escencia Flamenca» baǵdarlamasynyń onlain-kórsetilimi ótedi.
30 jyldyq ǵumyrynda bul ujym kóptegen jobalardy júzege asyrǵan. Sonyń ishinde, tanymal ártistermen jumys istep, filmderge túsip, álemdik opera juldyzdarymen kontsertterge qatysqan. «Flamenko kvintessentsiiasy» baǵdarlamasy 10 bólimnen turady. Munda ártister flamenko men onyń bolmysy týraly baiandaidy.
Festivalge qatysqandardyń biri – Qytai ulttyq baletin 24 sáýirde, saǵat 20:00 kóre alasyz. Eki bólimnen turatyn baǵdarlamaǵa horeograftar Van Tsi men Fei Bonyń eki miniatiýrasy engen. Sian Sinhai mýzykasyna qoiylǵan «Sary ózen» baletiniń sońǵy eki bólimi men P.I.Chaikovskiidiń «Patetikalyq» simfoniiasynyń mýzykasyna qoiylǵan «Ómir dastany» baleti.
Aita keteiik, spektaklder YouTube-arnasynyń «Premeralar» formatynda kórsetiledi. Platformadan spektaklderdiń bastalýy jaily habarlama alý úshin «Astana Balet» teatrynyń resmi arnasyna tirkelý qajet.
