29 jáne 30 qańtarda «Astana Balet» teatrynda álemdegi eń tanymal baletterdiń biri - P.Chaikovskii mýzykasyna Vasilii Vainonen qoiǵan «Shertkish» kórsetiletin bolady, dep habarlaidy atalǵan óner ordasynyń baspasóz qyzmeti.
Birinshi kúni «Astana Balet» sahnasynda Mashenka men Shertkishtiń partiiasyn Mariin teatrynyń ártisteri – prima-balerina Oksana Skorik pen solist Evgenii Konovalov oryndap shyǵady. Ekinshi kúni, iaǵni, 30-qańtarda basty partiialardy «Astana Balettiń» jetekshi solistteri Tatiana Ten men Súndet Sultanov oryndaidy.
Oksana Skorik klassikalyq muranyń altyn qoryna jatatyn kóptegen partiialardy oryndap kelgen. Onyń aýqymdy repertýarynda Hans van Manen, A.Ratmanskii, Ý.MakGregor jáne ózge de zamanaýi horeoraftardyń týyndylary da bar. Kóptegen halyqaralyq konkýrstar men syilyqtardyń laýreaty Oksana Skorik Perm horeografiia ýchilishesin 2007 jyly aiaqtap, sol jyly Mariin teatrynyń trýppasyna qabyldanyp, 2015 jyly prima-balerina mártebesine ie boldy. Vaganova atyndaǵy Orys baleti akademiiasynyń túlegi Evgenii Konovalov Mariin teatrynda 2012 jyldan bastap qyzmet etip keledi. Ol da klassikalyq repertýarmen qatar, XX jáne XXI ǵasyr horeograftarynyń týyndylaryn meńgergen.
Aita keteiik, «Astana Balet» teatrynda «Shertkishtiń» Vasilii Vainonen qoiǵan nusqasy kórsetilmek. Tórt jyl buryn ony astanalyq teatr sahnasyna RF halyq ártisi, QazUHA rektory Altynai Asylmuratova qoidy. Vainonenniń «Shertkish» baleti ertegidei jarqyn ári siqyrǵa toly spektakl sanalady. Bálkim, balalarǵa arnalǵandyqtan shyǵar. Onyń ústine, óner kórsetetin de balalar. Teatrdyń kásibi ártisterinen bólek, spektaklge Qazaq ulttyq horeografiia akademiiasynyń júz alpysqa jýyq stýdenti men oqýshysy qatysady.
Akademiialar men ýchilishelerde tálim alatyn bishilerdiń óskeleń urpaǵynyń osy tektes baiqaýy álemniń kóptegen teatrlary úshin dástúrge ainalǵan. 1958 jyly Mariin teatry óziniń «Shertkishin» Vaganova atyndaǵy Orys baleti akademiiasyna syiǵa tartyp, sol kezden bastap, oqý ornynyń túlekteri bul spektakldi diplomdyq týyndy retinde oryndap, úlken sahnada óner kórsetip, mol tájiribe jinaqtaityn boldy.
Spektakl negizine qýyrshaq pen tyshqan koroli týraly E. Gofmannyń nemis ertegisiniń A. Diýma-áke baiandaǵan nusqasy alynyp otyr. Spektakl stsenografiiasyn jobalap, jasap shyqqan Jandos Omarov, kostiým sýretshisi – Olga Shaishmelashvili. Simfoniialyq orkestrdiń jetekshisi maestro Arman Orazǵalieva.
