«Ózbekstandaǵy Qazaqstan jylynyń» aiasynda tanymal «Astana balet» teatrynyń ujymy ózderiniń úzdik qoiylymdary men spektaklderin tartý etpekshi, dep habarlaidy "Ult aqparat".
22 tamyzda Á.Navoi atyndaǵy Ózdekstan Úlken teatrynyń sahnasynda «Uly Dala murasy» baǵdarlamasy men «A Fuego Lento» bir aktili baleti kórsetiledi. Al, tamyzdyń 24 men 25 kúnderi A.Melikovtiń «Mahabbat týraly ańyz» atty áigili shyǵarmasy kórsetiledi. Bul balettiń Nur-Sultandaǵy premerasy zor qoshemetpen qabyldandy.
«Tashkent qalasyna alǵashqy gastrolin »Astana balet« teatry » Uly Dala murasy« baǵdarlamasymen ashpaqshy. Osy kontserttik baǵdarlama Qazaqstan, Eýropa men Amerikanyń iri qalalarynda kórermen yqylasyna bólengen bolatyn. Sebebi, munda ulttyq boiaýy qanyq halyq bii ulttyq kostiýmder men mýzykalyq súiemeldeýmen úilesim tapqan. Bul divertisment Uly Dalanyń jylnamasyna arnalǵan, túrli stilde jasalǵan horeografiialyq miniatiýralardan quralǵan», delingen habarlamada.
Horeografiia saltanatynyń shymyldyǵyn «A Fuego Lento» bir aktili baleti jabady. Neoklassika mánerinde jasalǵan spektakldi Braziliadan shaqyrylǵan horeograf Rikardo Amarante qoiǵan. Bul balet – braziliialyq sambo men tango mánerindegi bi ǵajaiyby. Bul qoiylymdy kórermender de, balet ártisteri de óte unatady. Sebebi, munda qushtarlyq sezimi, oryndaýshylyqtyń zor shyńy kórinis tapqan.
Gastroldiń qalǵan kúnderi ańyzǵa ainalǵan «Mahabbat týraly ańyz» baleti kórsetilmek. Úsh kórinisten turatyn balet bastapqyda Mariin teatrynda kórsetilip, sońynan Úlken teatr sahnasyna aýysty. Qoiýshy-horeograf Iýrii Grigorovich. «Astana Balet» teatrynyń sahnasyna laiyqtap, spektakldiń búge-shúgesine deiin, meilinshe dál qoiǵan Iýrii Grigorovichtiń assistentteri – Rýslan Pronin men Oksana Tsvetnitskaia.
Siýjet negizi – ejelgi parsy ańyzy. Apaly-sińilili Mehmene Baný men Shyryn sarai sýretshisi Farhatqa ǵashyq bolyp qalady. Bozbalanyń kóńili Shyrynǵa aýyp, Mehmene Banýmen aradaǵy qatynasy múmkin bolmaidy. Sebebi, bir kezderi patshaiym, syrqatqa shaldyqqan sińilisin aman alyp qalý úshin sulýlyǵyn tárk etken. Saraidan qashyp ketken ǵashyqtardy sarbazdar qolǵa túsiredi. Farhat bolsa, halqynyń amandyǵy úshin mahabbatynan bas tartady.
