«ٶزبەكستانداعى قازاقستان جىلىنىڭ» اياسىندا تانىمال «استانا بالەت» تەاترىنىڭ ۇجىمى ٶزدەرٸنٸڭ ٷزدٸك قويىلىمدارى مەن سپەكتاكلدەرٸن تارتۋ ەتپەكشٸ, دەپ حابارلايدى "ۇلت اقپارات".
22 تامىزدا ە.ناۆوي اتىنداعى ٶزدەكستان ٷلكەن تەاترىنىڭ ساحناسىندا «ۇلى دالا مۇراسى» باعدارلاماسى مەن «A Fuego Lento» بٸر اكتٸلٸ بالەتٸ كٶرسەتٸلەدٸ. ال, تامىزدىڭ 24 مەن 25 كٷندەرٸ ا.مەليكوۆتٸڭ «ماحاببات تۋرالى اڭىز» اتتى ەيگٸلٸ شىعارماسى كٶرسەتٸلەدٸ. بۇل بالەتتٸڭ نۇر-سۇلتانداعى پرەمەراسى زور قوشەمەتپەن قابىلداندى.
«تاشكەنت قالاسىنا العاشقى گاسترولٸن »استانا بالەت« تەاترى » ۇلى دالا مۇراسى« باعدارلاماسىمەن اشپاقشى. وسى كونتسەرتتٸك باعدارلاما قازاقستان, ەۋروپا مەن امەريكانىڭ ٸرٸ قالالارىندا كٶرەرمەن ىقىلاسىنا بٶلەنگەن بولاتىن. سەبەبٸ, مۇندا ۇلتتىق بوياۋى قانىق حالىق بيٸ ۇلتتىق كوستيۋمدەر مەن مۋزىكالىق سٷيەمەلدەۋمەن ٷيلەسٸم تاپقان. بۇل ديۆەرتيسمەنت ۇلى دالانىڭ جىلناماسىنا ارنالعان, تٷرلٸ ستيلدە جاسالعان حورەوگرافييالىق مينياتيۋرالاردان قۇرالعان», دەلٸنگەن حابارلامادا.
حورەوگرافييا سالتاناتىنىڭ شىمىلدىعىن «A Fuego Lento» بٸر اكتٸلٸ بالەتٸ جابادى. نەوكلاسسيكا مەنەرٸندە جاسالعان سپەكتاكلدٸ برازيليادان شاقىرىلعان حورەوگراف ريكاردو امارانتە قويعان. بۇل بالەت – برازيلييالىق سامبو مەن تانگو مەنەرٸندەگٸ بي عاجايىبى. بۇل قويىلىمدى كٶرەرمەندەر دە, بالەت ەرتٸستەرٸ دە ٶتە ۇناتادى. سەبەبٸ, مۇندا قۇشتارلىق سەزٸمٸ, ورىنداۋشىلىقتىڭ زور شىڭى كٶرٸنٸس تاپقان.
گاسترولدٸڭ قالعان كٷندەرٸ اڭىزعا اينالعان «ماحاببات تۋرالى اڭىز» بالەتٸ كٶرسەتٸلمەك. ٷش كٶرٸنٸستەن تۇراتىن بالەت باستاپقىدا ماريين تەاترىندا كٶرسەتٸلٸپ, سوڭىنان ٷلكەن تەاتر ساحناسىنا اۋىستى. قويۋشى-حورەوگراف يۋريي گريگوروۆيچ. «استانا بالەت» تەاترىنىڭ ساحناسىنا لايىقتاپ, سپەكتاكلدٸڭ بٷگە-شٷگەسٸنە دەيٸن, مەيلٸنشە دەل قويعان يۋريي گريگوروۆيچتٸڭ اسسيستەنتتەرٸ – رۋسلان پرونين مەن وكسانا تسۆەتنيتسكايا.
سيۋجەت نەگٸزٸ – ەجەلگٸ پارسى اڭىزى. اپالى-سٸڭٸلٸلٸ مەحمەنە بانۋ مەن شىرىن ساراي سۋرەتشٸسٸ فارحاتقا عاشىق بولىپ قالادى. بوزبالانىڭ كٶڭٸلٸ شىرىنعا اۋىپ, مەحمەنە بانۋمەن اراداعى قاتىناسى مٷمكٸن بولمايدى. سەبەبٸ, بٸر كەزدەرٸ پاتشايىم, سىرقاتقا شالدىققان سٸڭٸلٸسٸن امان الىپ قالۋ ٷشٸن سۇلۋلىعىن تەرك ەتكەن. سارايدان قاشىپ كەتكەن عاشىقتاردى ساربازدار قولعا تٷسٸرەدٸ. فارحات بولسا, حالقىنىڭ اماندىعى ٷشٸن ماحابباتىنان باس تارتادى.
