Ótken demalys kúnderi «Astana Balet» teatrynda koronavirýs infektsiiasymen kúreste myńdaǵan adamǵa demeý bola bilgen dárigerler men meditsina qyzmetkerlerine arnalǵan úsh qaiyrymdylyq kontserti ótti, dep habarlaidy "Ult aqparat".
«Biz úide oqshaýlanyp otyrǵanda, dárigerler jumys ornynda qalyp, adamdardyń densaýlyǵy men ómiri úshin jan aiamai kúresti. Sol sebepti de, biz, jańa maýsymnyń alǵashqy on kontsertin meditsina qyzmetkerlerine arnap, osylaisha alǵysymyz ben qurmetimizdi bildirgimiz keldi», - dedi «Astana Balet» teatrynyń direktory Aleksandr Sovostianov.
Astanalyq teatr ártisteri eki bólimnen turatyn kontserttik baǵdarlamasyn tartý etti: Rikardo Amaranteniń «LoveFearLoss» bir aktili baleti men «Uly Dala murasy» divertismenti. Osy horeografiialyq toptamaǵa Aigúl Táti, Anna Tsoi, Zaýyrbek Raibaev, Dáýren Ábirov syndy keshegi jáne búgingi qazaqstandyq baletmeisterler qoiǵan 13 bi miniatiýrasy engen.
Kontserttiń erekshe missiiasy jaily «Astana Balet» teatrynyń horeografy, Qazaqstannyń eńbek sińirgen qairatkeri Aigúl Táti aityp berdi.
«Bizdiń horeografiialyq tartýymyz shynaiy qurmetten týyndap otyr. Biz bul ónerdiń emdik qasietine senemiz. Ol rýhyńyzdy asqaqtatyp, janyńyzdy jadyratady. Qazirgidei kúrdeli kezeńde munyń ózi óte mańyzdy», - deidi ol.
«Astana Balet» teatrynyń jetekshi solisi Aijan Muqatova da onyń bul oiymen kelisip, ilip áketti.
«Qiyndyqqa tózip, óz ómirine tóngen qaýipke qaramai, dárigerlik mindetin adal atqaryp júrgen adamdarǵa degen qurmetim sheksiz», - deidi ol.
Jeti júzden astam adamǵa arnalǵan kórermen zaly burynǵydai emes, ózgesheleý kórindi: astanalyq sanitar dárigerdiń qaýlysyna sáikes spektakl aýditoriiasy elý adamnan aspaýy tiis. Alaida, osynshalyqty bos zaldyń ózinde kontsertten keiin ártisterge kórsetilgen qoshemet óte zor edi.
«Erekshe estetikalyq lázzat aldym. Ártisterdiń plastikasy qandai, shirkin?! Zamanaýi órnekterge bai ulttyq naqyshtaǵy bi qandai?! Bári óte ádemi, óte áserli boldy. Talantty ártisterińiz qýanyshty kóńil-kúiimen bólisti. Muny ár kórermen sezingenine shúbám joq», - deidi qalalyq ftiziopýlmonologiia ortalyǵynyń dárigeri Gúlnár Amanjolova.
Teatr basshylyǵy on qaiyrymdylyq kontsertin ótkizýdi josparlaǵan, sonyń altaýy Shymkent pen Nur-Sultan qalalarynda ótti.
Qarasha aiynda teatr Qaraǵandy men Semeide taǵy 4 qaiyrymdylyq kontsertin ótkizbekshi.
