21 shilde kúni Astananyń qoǵamdyq kólikpen júrý tarifterine engizilgen ózgerister kúshine enedi, dep habarlaidy QazAqparat.
Buǵan deiin habarlaǵanymyzdai, «Astana LRT» jáne elorda ákimdigi qalalyq jáne qalamańy avtobýstaryna saralanǵan tarifter engizýdi usynyp, ony máslihat depýtattary qoldaǵan bolatyn. Ondaǵy maqsat - qoǵamdyq kólik salasyndaǵy kóleńkeli aqsha ainalymyn túp tamyrymen joiý, biýdjetke túsimderdi molaitý, qalanyń kólik júiesin odan ári damytýǵa kóbirek qarajat bólý.
2018 jyldyń 10 shildesinde «Astana aqshamy», «Vecherniaia Astana» gazetterinde jáne Astana ákimdigi saitynda tiisti Qaýlynyń mátini jariialandy. Sondai-aq turǵyndarǵa elektrondyq kartalardy satyp alýǵa 21 shildege deiin ýaqyt berildi. Sebebi saralanǵan tarifter qolma-qol jáne qolma-qol aqshasyz elektrondyq kartamen esebep aiyrysýdy qarastyrady.
Atap aitqanda, 21 shildeden bastap qalaishilik avtobýstarda qolma-qol aqshasyz elektrondyq kartamen tóleý 90 teńgeni quraityn bolady. Elektrondy kartalardy satyp alyp úlgermegender kondýktorǵa qolma-qol aqshamen 180 teńge tóleidi.
Sondai-aq jolaýshylar men bagajdy qoǵamdyq ekspress kólikpen tasymaldaý qolma-qol aqshamen 250 teńgeni quramaq (qazirgi tarif 150 teńge).
Astana qalasynyń qalamańy qatynastarynda qolma-qol aqshasyz elektrondyq karta arqyly tóleý 1 kilometr úshin 8,0 teńgege teń. Al qalamańy qatynastarynda qolma-qol aqshamen esep aiyrysý 1 kilometr úshin 11,5 teńge bolady.
Bul rette, elektrondyq kartany oqityn validatorlar jumys istemei tursa, jolaýshylar avtobýsta tegin júrýge quqyly.
«Astana LRT» Basqarma tóraǵasy Bekmyrza Igenberdinov búgin ótken baspasóz máslihatynda atap ótkendei, tek sońǵy eki kúnde 16 500 kólik kartasy satyldy. Jyl basynda kólik kartasyn qoldanýshylar 5% bolsa, qazir 50% asyp jyǵyldy.
Taǵy atap óterligi, buǵan deiin jol júrý aqysynan bosatylǵan jeńildik sanattaryndaǵy azamattar úshin jolaýshylardy tasymaldaý erejeleri ózgerissiz qalady.
Eske salaiyq, elordalyq zeinetkerler 2018 jyldyń 1 shildesine deiin jolaqydan bosatatyn derbes elektrondyq kartalardy rásimdeýge mindettelgen bolatyn. Kartany alyp úlgermegen zeinetkerler 1 shildeden búginge deiin 90 teńge qolma-qol aqshamen tólep keldi. Erteńnen bastap 180 teńge tóleitin bolady.
«Avtomobil kóligi týraly» QR Zańyna sáikes, 7 jastan 15 jasqa deiingi balalar úshin qalalyq jáne qalamańy qatynastarynda astananyń qoǵamdyq kóligimen júrý tarifi jolaqynyń tolyq kóleminiń elý paiyzyna teń.
