"Astana LRT" JShS kólik basqarmasy tóraǵasynyń orynbasary Rýstam Halilev Astana áýejaiyndaǵy avtoturaqtyń baǵasy nelikten qymbat ekenin túsindirip berdi, - dep habarlaidy kaz.tengrinews.kz tilshisi.
Rýstam Halilevtiń aitýynsha, áýejai jolaýshylaryna kólikterin turaqqa qoiýdyń birneshe nusqasyn usynady.
"Qysqa merzimge turaqqa qoiý degen termin bar. Siz keldińiz, jolaýshyny túsirip, birden qaityp kettińiz. Jabyq avtoturaq ta bar, ol uzaq merzimge beriledi, iaǵni 5 saǵattan asa ýaqyttan bastap. Tegin turaq ta bar. Terminaldan sál ótseńiz. Jalpy, ózińiz qaisy turaqty qalaisyz, sony tańdai alasyz", - dedi Rýstam Halilev.
"Biletti alatyn kezde tariftik jospardy kóresiz. Siz avtoturaqqa kirip kele jatqanda kórsetilgen barlyq erejemen kelisesiz. (...). Tarifter jaily aitatyn bolsaq, 30 minýt tegin, alǵashqy birinshi saǵat - 300 teńge, kelesi saǵat úshin 1 500 teńge. Ashyq avtoturaqta barynsha barlyq jaǵdai jasalǵan. Táýligine - 2000 teńge. Iaǵni, bul tarifti tańdaýǵa barlynyń quqyǵy bar", - dedi ol.
Sondai-aq, ol avtoturaqqa táýligine birneshe myń teńge tólegen turǵyndardyń máselesine qatysty túsinik berdi.
"Maqsatymyz tarifti 30 myń nemese 50 myń teńge qylý emes. Kompaniia túsindirý jumystaryn júrgizgen bolatyn", - dep aityp ótti "Astana LRT" JShS kólik basqarmasy tóraǵasynyń orynbasary.
Sonymen qatar, Rýstam Halilev aldaǵy ýaqytta engizilý múmkin jańalyqtar jaiynda aityp berdi.
"Keleside avtoturaqqa kirip-shyǵý tólemderin jasaýǵa bolatyn mobildik qosymsha oilap tabý josparda bar. Bul týraly bólek aitatyn bolamyz", - dedi Rýstam Halilev.
Eske sala keteiik, osyǵan deiin Astana áýejaiynda avtoturaqqa bir táýlikke qoiylǵan kólik úshin 57 myń teńgeniń tólengeni jaily aitylǵan bolatyn. Parkomatqa qarajat tóleý sáti túsirilgen videony Instagram jelisine belgili ánshi Qairat Baekenov jariialady. Kadrlarǵa qaraǵanda, mundai qyrýar qarajatty kólikti bir táýlik jáne on saǵatqa qoiylǵan kólik úshin tóleý qajet bolǵan.
Sondai-aq, "Astana Arlans" klýbynyń burynǵy bas direktory, qazirde Parlament Májilisiniń depýtaty Serik Sápiev Instagram jelisinde Astana ákimi Áset Isekeshevke áýejaidaǵy avtoturaq qunynyń shekten tys qymbat ekenin aityp, shaǵymdanǵan bolatyn.
