Ádilet ministri Marat Beketaev Astana ataýyn ózgertý týraly sheshim nege referendýmsyz qabyldanǵanyn túsindirip, qujattar men mańdaisha jazbalardyń qashan aýysatyny týraly aitty, dep habarlaidy Sputnik agenttigi.
"Referendýmǵa shyǵarýdy usyndyq"
Beketaevtyń sózine súiensek, Qazaqstan Konstitýtsiiasynyń 91-babyna sáikes, eldiń Ata zańyna ózgertýler men tolyqtyrýlar respýblikalyq referendým arqyly engiziledi. Al referendým prezidenttiń óz sheshimimen nemese parlament pen úkimettiń usynysy boiynsha júrgiziledi.
Biraq Konstitýtsiiaǵa ózgertýler men tolyqtyrýlar engizý týraly zań jobasy, prezident parlamenttiń qaraýyna jiberýge sheshim qabyldasa, respýblikalyq referendýmǵa jiberilmeýi múmkin.
"Shyndyǵynda, 48-bap prezidenttiń Konstitýtsiiaǵa ózgertý engizýge bastamashy bolý quqyǵyn shekteidi, sebebi ol sailanǵan prezident emes, ýaqytsha mindetin atqarýshy. Bul onyń quqyǵyn shekteidi. Biraq Konstitýtsiia buzylǵan joq, sebebi bastamany 91-shi bapqa sáikes úkimet kóterip otyr. Biz zań jobasyn referendýmda qaraý týraly qaýlyǵa daýys berdik. Prezident kelispedi de, zań jobasyn parlamentke jiberdi. Sebebi bul zań jobasyn referendýmda da, parlamentte de Konstitýtsiiada bekitilgen normalardy saqtai otyryp qaraýǵa bolady", - dep atap ótti ministr.
Astana qashan Nursultan bolady?
Tilshilerdiń Astana búginnen bastap Nursultan bolyp ózgere me degen suraǵyna ministr bylai dep jaýap berdi: "Iá, búginnen bastap".
Nursultan turǵyndary qashan qujattaryn aýystyrady?
Ádilet ministri málimdegendei, turǵyndar qujattaryn jaramdylyq merzimi bitkennen keiin aýystyratyn bolady. Al mekenjailary avtomatty túrde ózgeredi.
Beketaevtyń sózine súiensek, kóshedegi siltemeler men mańdaishalar óz ýaqytymen birtindep aiyrbastalady.
"Tarihta kóptegen qalanyń ataýy ózgerdi, bir túnde barlyq ataý men mańdaishany aýystyryp jiberemiz deýge kelmeidi. Birtindep bári ózgeretin bolady", - dep túsindirdi ol.
