Astana ákimi Jeńis Qasymbek qaladaǵy qoǵamdyq múlikke uqypty qaraýǵa shaqyrdy, dep habarlaidy ult.kz.
Ákimniń aitýynsha, qalada turǵyndarǵa qolaily orta qalyptastyrý úshin kún saiyn abattandyrý jumystary júrgiziledi. Alaida qoǵamdyq keńistikterge ziian keltirý jaǵdailary da kezdesedi.
«Jekelegen jaýapsyz azamattar aialdama pavilondaryn, qoqys jáshikterin, oryndyqtardy, músinderdi jáne basqa da abattandyrý elementterin búldiredi. Olardyń arasynda kámeletke tolmaǵandar da bar», – dep jazdy Jeńis Qasymbek.
Ol Memleket basshysynyń quqyqtyq nigilizmge búkil qoǵam bolyp qarsy turý qajet ekenin atap ótkenin eske saldy.
Ákimniń sózinshe, qoǵamdyq múlikke degen kózqaras adamnyń mádenieti men tárbiesiniń kórsetkishi sanalady. Qala infraqurylymyn búldirý tek elordaǵa materialdyq shyǵyn keltirip qoimai, turǵyndar men qala qonaqtaryna da qolaisyzdyq týǵyzady.
«Qoǵamdyq múlikke uqypty qaraý – ár adamnyń azamattyq jaýapkershiliginiń kórinisi. Qalada jasalyp jatqan barlyq nysan eń aldymen adamdarǵa qolaily jaǵdai jasaý úshin qajet», – dedi ákim.
Onyń málimetinshe, bótenniń jáne kommýnaldyq múlikti búldirgeni nemese joiǵany úshin 143 adam jaýapkershilikke tartylǵan. Sonymen qatar qoǵamdyq oryndardy lastaýǵa bailanysty 928 ákimshilik quqyq buzýshylyq tirkelgen.
Qasymbek esirtki zattaryn jarnamalaý maqsatynda salynatyn graffitilerdi joiý boiynsha da jumystar júrgizilip jatqanyn aitty.
Qala ákimdigi politsiiamen birlesip qoǵamdyq tártipti qamtamasyz etý jáne quqyq buzýshylyqtardyń aldyn alý jumystaryn júrgizip jatyr. Kóshelerdegi beinebaqylaý kameralarynyń sany da jyl saiyn artyp keledi.
«Birde-bir quqyq buzýshylyq jazasyz qalmaidy. Qoǵamda zań buzýshylyqtarǵa nóldik tózimdilik pen qoǵamdyq aiyptaý qalyptasýy kerek», – dep jazdy Astana ákimi.
Onyń aitýynsha, zańǵa sáikes qoǵamdyq tártipke qarsy áreketter úshin qylmystyq jaýapkershilikke deiin jaza qoldanylýy múmkin. Kámeletke tolmaǵandar quqyq buzǵan jaǵdaida olardyń ata-analary da jaýapqa tartylady.
Jeńis Qasymbek elorda turǵyndary men qonaqtaryn qalaǵa uqypty qaraýǵa shaqyrdy.
