Astana qalasynyń ákimi Áset Isekeshevtiń aitýynsha, astanalyqtar jyl saiyn 500 myń tonna azyq-túlik ónimderin tutynady, dep habarlaidy Ult.kz tilshisi QazAqparat agenttigine silteme jasap.
«Qazirgi kezde biz «Atameken» palatasymen jumys istep jatyrmyz. Jazda azyq-tutyný kólemi 160 myń tonnany quraidy degen boljam bar. Demek, 10-20 paiyzǵa ósim bolady. Sebebi kóp qonaq keledi», - dedi Isekeshev Astana qalasy kásipkerleriniń jyl saiynǵy konferentsiiasynda.
Ákimniń sózine qaraǵanda, búginde birqatar azyq-túlik ónimderi boiynsha tapshylyq baiqalady. Al EKSPO kezinde baǵanyń turaqtylyǵyn qamtamasyz etý úshin kóterme taratýshy ortalyqtaryn ashý josparlanǵan. Aýyl sharýashylyǵy ónim óndirýshileri sol jerge óz taýarlaryn jetkizip, tiimdi baǵamen sata alady.
Aita keteiik, búgingi jiyn barysynda Isekeshev azyq-túlik dúkenderi men dárixanalary az jerlerde ondai biznesti ashýǵa niet tanytqan kásipkerlerge jeńildik jasaýǵa daiyn ekenin jetkizdi.
«Biz qala boiynsha 129 sektordy anyqtap aldyq. Árbir sektorda shamamen 10 myń adam turady. Olardyń turatyn jerine qaramastan, árbir adam úshin tiisti qyzmetter teń bolýy qajet, iaǵni qoljetimdi bolýy kerek. Osyǵan orai 32 áleýmettik standart ázirlendi. Máselen, qazir qalanyń keibir jerlerinde balabaqshalar, dárixanalar men dúkender jetispei jatyr. Sondyqtan biz ózimizdiń barlyq kommýnaldyq múligimizdi konkýrsqa shyǵaratyn bolamyz. Sonyń ishinde ǵimarattardaǵy nysandar da bar. Sóitip, áleýmettik mańyzy bar qyzmetter, mysaly, «Dáriger janyńyzda» jobasy aiasynda ashylatyn meditsinalyq ortalyqtar men emhanalar úshin nysandy jalǵa alýdyń jeńildetilgen stavkasyn qoiamyz. Sondyqtan biznes úshin biraz jeńildikter bolady», - deidi ákim.
