Astana ákimi Baqyt Sultanov aýa raiyna bailanysty qala turǵyndaryna ótinish jasady, dep habarlaidy "Ult aqparat" elorda ákimdiginiń baspasóz qyzmetine silteme jasap.
Astanada boran bastalyp, aiaz kúsheidi.
«Qazgidromettiń» aqparaty boiynsha 5 aqpan kúni Astana aýmaǵynda qar jaýyp, burqasyn bolady. Batystan, soltústik-shyǵystan soqqan jel ekpini sekýndyna 15-20 metr bolady, al 6-7 aqpanda túnde aiaz -37-39 gradýsqa deiin jetedi. Osyǵan bailanysty elorda ákimi Baqyt Sultanov qala turǵyndary men qonaqtaryna ótinish bildirdi.
Ákim barlyq uiymdardyń basshylaryna jáne jeke kásipkerlerge qarata aiazda qalǵan jandarǵa kómek kórsetýge jáne jumys, oqý oryndary, turǵyn úi-jailardaǵy jylýǵa kóńil bólip, dalada turǵan adamdarǵa jylynýǵa ruqsat berýge, múmkindik bolsa boiyn jylytý úshin ystyq shai berýge shaqyrdy.
Baqyt Sultanovtyń aitýynsha, qatty aiaz kúnderi turǵyndarǵa muqiiat bolý, bir-birine qamqorlyq kórsetip, jaiaý júrginshilerdi múmkindiginshe jetkizip salǵandary durys. Qala basshysy memlekettik organdar, bilim berý mekemeleri, kásipkerlik obektiler (bazarlar, SOSO) jáne qurylys alańdarynda jumys ýaqytyn qysqartýdy usyndy. Al qala tirshiligin qamtamasyz etetin órt sóndirý, politsiia qyzmeti, tótenshe jaǵdailar departamenti, jedel meditsinalyq kómek, meditsinalyq mekemeler, kommýnaldyq qyzmet qyzmetkerleri ádettegi kestemen jumysyn jalǵastyrady.
Aýdan ákimderine páter ieleri kooperativterimen birlese otyryp turǵyndardyń qaýipsizdigin qamtamasyz etý, turǵyn úilerdiń qasbetterin jáne úi-jailardyń shatyrynyń, qorshaýlardyń ushýynan bolatyn jazataiym oqiǵalardyń aldyn alý máselelerin pysyqtaý tapsyryldy. Odan bólek, ákim qalalyq kommýnaldyq qyzmetterge qoǵamdyq kólik jolaýshylaryna arnap aialdamalarda jáne adam kóp jinalatyn oryndarda jylyný oryndaryn uiymdastyrýdy jáne TJD-niń jumysyn kúsheitýdi tapsyrdy.
Sonymen qatar, jolaýshylar qaýipsizdigin qamtamasyz etý maqsatynda qaladan Telman kenti, Qosshy jáne Prigorodnyiǵa qatynaityn negizgi baǵyttar boiynsha TJD-nyń arnaiy tehnikasy kezekshilikte júretin bolady. Qutqarýshylar «Aziia park» SÚ, «Saianur-2» TK, Beisekova kóshesinen qatynaityn bolady.
