29 qazandaǵy jaǵdai boiynsha Astanada 10 myń tonnadan astam kómir qory bar, dep habarlaidy QazAqparat tilshisi.
Elordanyń qysqa daiarlyǵy týraly Astana qalasynyń otyn-energetikalyq kesheni jáne kommýnaldyq sharýashylyǵy basqarmasy otyn-energetikalyq resýrstar bóliminiń basshysy Maqsat Esmaǵulov keńirek aityp berdi.
«Ótken aptada, iaǵni 19-26 qazan aralyǵynda qalamyzǵa 174 vagon qatty otyn jetkizildi. Ol degenińiz - 12059 tonna kómir. Onyń ishinde 64 vagon Shubarkólden, 26 vagon Qarajyradan, 56 vagon Maikúbiden kelse, 22 vagon Kýznetskii markaly kómir bolsa, 6 vagon Bogatyr markaly kómir. Ótken aptanyń senbi-jeksenbisinde jáne dúisenbi kúni tańerteń bizge 61 vagon, iaǵni 4253 tonna kómir elordaǵa jetkizildi», - deidi ol elordada ótken baspasóz máslihatynda.
Maqsat Esmaǵulovtyń aitýynsha, 61 vagonnyń 35-i (2335 tonna) Shubarkólden, 6 vagony (420 tonna) Qarajyradan, 14 vagony (978 tonna) Maikúbiden kelse, 6 vagony (420 tonna) Bogatyr markaly kómir bolyp otyr.
«Osy jyly Astana qalasynyń ákimdigi men kómirdi satatyn 8 kompaniia ózara memorandýmǵa qol qoiǵan bolatyn. Atalǵan kelisim aiasynda bizde kómirdiń ár túrine bailanysty baǵalar bekitildi. Iaǵni, qazirgi tańda Shubarkól kómiriniń tonnasy 13600 teńgeden, Qarajyra kómiriniń tonnasy 14000 teńgeden, Maikúbi 12500 teńge, Bogatyr kómiri 9500 teńgeden, Kýzntskii kómiri 12500 teńgeden satylyp jatyr. 29 qazan keshki saǵat 18:00-degi jaǵdai boiynsha jalpy kómir qorynyń mólsheri 10 myń 255 tonny quraidy», - deidi ol.
Onyń aitýynsha, kómirdiń jetkizilýi boiynsha qazir jaǵdai turaqty.
«Ótken jylǵydai úlken dúrbeleń qazir joq. Bunyń bári de maýsym aiynan beri belsendi túrde júrgizilgen ákimdiktiń arqasy ekenin aita ketý kerek», - deidi Maqsat Esmaǵulov.
