Assy-Túrgen ústirtindegi observatoriia mańynan mal qorymy tabyldy, - dep habarlaidy Tengrinews.kz agenttigi.
Qorymdy tapqan observatoriia qyzmetkeriniń aitýynsha, adamdar aýyzsý alatyn mańaida janýarlar óleksesi jatyr.
"Bir kún buryn observatoriianyń bastoǵanyn teksergende mal óleksesi jatqan shuńqyrdy baiqadyq. Bul siyrlardyń jatqanyna eki apta boldy. Bul jerde buryn-sońdy mal qorymy bolmaǵan. Bul tipti mal qorym da emes, olardy jai ǵana shuńqyrǵa laqtyryp tastaǵan", - deidi Assy-Túrgen observatoriiasynyń injeneri Maksim Krýgov.
Baqtashylardyń aitýynsha, biyl 30-dan asa siyr ólgen.
"Bul shuńqyrda jeti siyrdai bar. Ol sý alatyn jerden 200 metr qashyqtyqta jatyr. Observatoriia qyzmetkerleri men týrister aýyzsýdy osydan alady. Biz ólekse sýǵa túse me dep alańdaimyz", - dep qosty ol.
Bastoǵannan sý muzdyq sýlary jinalatyn jer asty sý qoimasyna, sodan keiin observatoriiaǵa qubyr arqyly barady. Observatoriiaǵa baratyn 7 shaqyrymdyq sý qubyry ótken ǵasyrdyń 80-jyldary salynǵan. Sý alatyn jerdiń joǵarǵy bóliginde mal qorymdary tabyldy.
Observatoriiada qazir 12 adam jumys isteidi, demalys kúnderi bul aimaqqa týrister kóp keledi.
"Qyzmetkerler men týrister ýlanyp qalýy múmkin dep alańdaimyz, óitkeni biz maldyń máselesi neden bolǵanyn, olardyń neden ólgenin bilmeimiz. Sibir jarasy, sýyq tidi nemese olar kovidten óldi. Bastoǵannan bir siyr tabylsa, qasqyrjep ketti der edik, biraq munda arnaiy shuńqyr qazyp, ólekselerdi tógip tastaǵan", - dedi Krýgov.
Almaty oblysy veterinariia basqarmasy maldyń shyǵynǵa ushyraýyna qatysty pikir bildirdi.
"Búginde maldyń juqpaly emes aýrýmen ólý deregi anyqtaldy. Bul janýarlar dereý joiylýǵa jatady. Janýarlardyń aýyryp, jappai qyrylý derekteri boiynsha mal ielerinen aryz-shaǵym túsken joq. Qazir jailaýdaǵy epizootiia jaǵdaiy veterinariia mamandardyń turaqty baqylaýynda. Janýarlardyń máiitin joiý úshin mal qorymdary bar. Sondai-aq, biyl qosymsha bes shuńqyr qazyldy", -delingen habarlamada.
Vedomstvo málimetinshe, "biylǵy 1 maýsym men 15 shilde aralyǵynda 15 máiit jinalǵan. 20 shildeden beri 8 máiit anyqtalyp, joiyldy".
