Búgin Ońtústik Qazaqstan oblystyq Qazaqstan halqy Assambleiasy Keńesiniń otyrysynda memlekettik tildiń latyn grafikasyna ótý jaiy talqylandy, dep habarlaidy "Ult aqparat" OQO ákiminiń baspasóz qyzmetine silteme jasap.
«Qoǵamdyq kelisim» mekemesiniń ǵimaratynda ótken keńestiń otyrysyna keńes músheleri men oblystaǵy etnomádeni birlestikterdiń tóraǵalary jáne assambleia janyndaǵy Qoǵamdyq kelisim keńesi, Analar keńesi, ǵylymi-sarapshylyq top pen oblystyq máslihattaǵy «El birligi» depýtattyq tobynyń jetekshileri men beldi ókilderi qatysty.
Keńes otyrysyn Ońtústik Qazaqstan oblystyq Qazaqstan halqy Assambleiasy tóraǵasynyń orynbasary, oblystyq assambleia hatshylyǵynyń meńgerýshisi Muratáli Qalmuratov ashyp júrgizdi.
Ol óz sózinde kúni keshe ǵana memlekettik tildiń latyn grafikasyna ótýi boiynsha parlamenttik tyńdaý ótkenin habarlap, bul másele boiynsha jalpyhalyqtyq talqylaý júrgizý boiynsha sheshim qabyldanǵanyn málimdedi.
Qazaq tiliniń latyn qarpine ótýi zaman talaby men órkeniet suranysy ekendigin aityp, baiypty bastamanyń negizgi artyqshylyqtaryna keńinen toqtaldy. Kún tártibindegi másele boiynsha pikir bildirýge shaqyrdy. Jinalǵan usynystar men pikirler ekshelenip, tiisti organdarǵa usynylatynyn habarlady.
Otyrys barysynda OQO QHA tóraǵasynyń orynbasarlary oblystyq korei etnomádeni birlestiginiń tóraiymy Roza Pak pen oblystyq grýzin etnomádeni birlestiginiń tóraǵasy Zaal Bochorishvili, Qazaqstandaǵy ózbekter qoǵamdyq birlestikteri «Dýstlik» qaýymdastyǵynyń jetekshisi Ikramjan Hashimjanov, oblystyq qoǵamdyq kelisim keńesiniń múshesi Baidýlla Qonysbek, oblystyq Analar keńesiniń tóraiymy Balhiia Kómekbaeva, oblystyq ardagerler keńesiniń tóraǵasy, qoǵamdyq kelisim keńesiniń múshesi Jeńisbek Máýlenqulov, OQO QHA janyndaǵy ǵylymi-sarapshylyq toptyń jetekshisi, professor Asma Qalybekova sóz sóilep, elimizde ýaqtyly qolǵa alynǵan bastamany biraýyzdan qoldaityndyǵyn jetkizdi, Tilderdi damytýdyń respýblikalyq úilestirý-ádistemelik ortalyǵy usynǵan qazaq tiliniń latyn grafikasyna negizdelgen əlipbi jobasyn osyndai otyrystar men jiyndarda jan-jaqty saralap, taldap, talqylaýǵa shaqyrdy.
Búginde ulttyq qarip júiesine reforma júrgizgen Ázirbaijan, Túrkimenstan, Ózbekstan sekildi burynǵy Odaqtas respýblikalardyń tájiribelerin zerdelep, olardyń kemshilikterinen sabaq alýǵa bolatynyn airyqsha aitqan qatysýshylar jańa álipbi boiynsha túsindirý jumystaryna barynsha basymdyq berý kerek degen ýájge toqtady.
