Biyl Qazaqstan Konstitýtsiiasyna 26 jyl. 1995 jyly 30 tamyzda jalpyhalyqtyq referendýmda elimizdiń negizgi qujaty Ata Zań qabyldanǵan bolatyn. Osyǵan orai, Qazaqstan halqy Assambleiasy ár óńirde Konstitýtsiia kúnin atap ótip jatyr, - dep habarlaidy «Ult aqparat».
Konstitýtsiia kúnine arnalǵan sharalardyń basy Almaty qalasyndaǵy Dostyqt úiinde Konstitýtsiia - Qazaqstan halqynyń birligi men rýhani kelisiminiń negizi» taqyrybynda respýblikalyq dóńgelek ústelmen bastaý aldy.
Dóńgelek ústelge qatysýshylar egemendi Qazaqstannyń quqyqtyq jáne demokratiialyq memleket retinde qalyptasýyndaǵy, qoǵamdyq kelisim men birliktiń qazaqstandyq modelin damytýdaǵy Konstitýtsiianyń tarihi rólin talqylady. Baiandamashylar Konstitýtsiia demokratiialyq saiasi júiesi, ashyq naryqtyq ekonomikasy, beibit saiasaty bar qazirgi Qazaqstannyń qurylysyna negiz bolǵanyn, bul eldiń álemdegi bedeliniń ósýine yqpal etkenin atap ótti.
«Qazaqstan Táýelsizdik alǵaly túrli ult ókilderin bir shańyraq astyna jinap, tatý-tátti ómir súrýge múmkindik berdi. Osydan 30 jyl buryn Táýelsizdik alsaq, 26 jyl buryn Ata zańymyzdy bekittik. Zań kópultty Qazaqstan úshin óte mańyzdy. Osy oraida barsha qazaqstandyqtar men assambleialyqtardy Konstitýtsiia kúnimen quttyqtaǵym keledi. Osy zańnyń arqasynda bárimiz yntymaq-birligi jarasqan úide ómir súrip kelemiz», - dedi til janashyry Asyly Osman.
Asyly Osmannyń aitýynsha, Qazaqstannyń etnostarynyń ókilderi memlekettik tildi úirenýdiń mańyzdylyǵyn túsinedi, jyldan jylǵa qazaq tilinde sóileitin jas urpaqtyń sany artyp keledi. Qazaqstan halqy Assambleiasy da osy baǵytta jumys jasap, memlekettik tildi úirenýge arnalǵan túrli jobalardy júzege asyrýda.
Atalǵan is-sharaǵa memlekettik organdardyń ókilderi, etnomádeni birlestikterdiń jetekshileri men músheleri, QHA qoǵamdyq qurylymdarynyń, Qazaqstan halqy Assambleiasy kafedralary, ǵylymi jáne shyǵarmashylyq intelligentsiia, etnomádeni birlestikter jastary, QHA «Jańǵyrý joly» jastar qozǵalysynyń músheleri men BAQ ókilderi qatysty.
Al Qaraǵandy qalasynda erekshe aktsiia ótti. Atap aitqanda, QHA eriktileri qala turǵyndaryna mereke qarsańynda quttyqtaý hattar men magnit japsyrmalary tartý etti. Atalǵan aktsiia koronavirýstyq infektsiianyń taralýyna bailanysty sanitarlyq talaptardy saqtai otyryp ótkizildi.
«Jumysqa asyǵyp bara jatqan, oi jeteginde júrgen qaraǵandylyqtarǵa bizdiń aktsiiamyz erekshe áser etti. Kóshede syi tarqatyp turǵanymyzda syilyqty alǵan árbir adamnyń jadyrap sala bergenin kórdik. Konstitýtsiia kúni árbir qazaqstandyq úshin mańyzdy dep bilemiz. Bizdiń árqaisymyzdyń quqyǵymyzdy qorǵaityn zań qashanda mańyzdy. Osyndai Ata Zańy berik, yntymaǵy jarasqan Táýelsiz Qazaqstanda ómir súretinimdi maqtan etemin», - dedi qaraǵandylyq erikti.
Sonymen birge, Taldyqorǵan qalasynda «Ata zańym – aibynym!» atty jyl saiynǵy dástúrli dóńgelek ústel ótti. «Almaty oblysynyń ishki saiasat basqarmasy «Qoǵamdyq kelisim» KMM-niń uiymdastyrýymen ótken dóńgelek ústelge Almaty oblysy Qazaqstan halqy Assambleiasy etnomádeni birlestikterdiń ókilderi, Analar keńesiniń músheleri, kásibi mediatorlar, áskeri qyzmetkerler qatysty.
«Konstitýtsiia kúni elimizdegi eń eleýli merekelerdiń biri. Ata Zańymyz árbir qazaqstandyq úshin qyzmet etip kele jatqanyna mine 26 jyl tolyp otyr. Al Almaty oblysy túrli etnos ókilderi kóp ómir súretin aimaqtardyń biri. Búgingi dóńgelek ústelge qatysýshylardy osy aitýly merekemen shyn júrekten quttyqtaimyn. Osy otyrǵan árqaisymyz Ata Zańymyzdy qurmetteýge, oǵan baǵynýǵa, balalarymyzǵa bul Zań men osy kúnniń mańyzdylyǵyn túsindirip tárbieleýge mindettimiz. Búgingi uiymdastyrylyp otyrǵan sharanyń da negizgi maqsaty osy bolatyn», - dedi «Almaty oblysynyń ishki saiasat basqarmasy» mekemesiniń uiymdastyrý jumysy bóliminiń basshysy Altyn Jambylqyzy.
Sondai-aq, sharada Konstitýtsiia memlekettik biliktiń qainar kózi halyqtyń ózi ekeni, óz Konstitýtsiiasyn qabyldaý arqyly Qazaqstan jańa dáýirge qadam basqany týraly aityldy. Is-shara sońynda oblystyq Assambleia qyzmetine belsendi qatysqany úshin QHA janyndaǵy qurylymdardyń birqatar belsendileri alǵys hattarmen marapattaldy.
Osyǵan uqsas dóńgelek ústel Kókshetaý qalasynda da ótti. Memlekettik organdardyń ókilderi, etnomádeni birlestikterdiń basshylary, buqaralyq aqparat quraldary qatysqan sharada Konstitýtsiia kúniniń mańyzdylyǵy atap ótildi. Sharaǵa arnaiy qatysqan «Qoǵamdyq kelisim» KMM basshysy E.Nuǵymanov Konstitýtsiianyń qazaqstandyqtardyń ómirindegi rólin, onyń erejeleri memlekettiń táýelsizdigine qol jetkizýdiń, azamattyq institýttardy damytýdyń, eldiń álemdik qoǵamdastyqqa tanylýynyń irgetasyna ainalǵanyn atap ótti.
«Barshańyzǵa belgili, Konstitýtsiia eldiń negizgi zańy retinde Qazaqstan halqynyń erkin, onyń eldi demokratiialyq, zaiyrly, quqyqtyq jáne áleýmettik memleket retinde ornyqtyrýǵa degen umtylysyn kórsetedi. Onyń eń qymbat qazynasy adam jáne adamnyń ómiri, quqyqtary men bostandyqtary bolyp tabylady. Sondyqtan da qazaqstandyqtar úshin Ata Zań men oǵan arnalǵan resmi kún árqashan mańyzdy», - dedi ol.
Al elimizdiń astanasy Nur-Sultan qalasynyń Dostyq úiinde Konstitýtsiia kúnine arnalǵan onlain-kontsert ótti. Konstitýtsiia mártebesin arttyrý, eldiń birligi men yntymaǵyn dáripteý, jasóspirimderdi otansúigishtikke, eljandylyqqa tárbieleý maqsatynda uiymdastyrylǵan bul sharany barlyq qazaqstandyqtar onlain tamashalai aldy. Atalǵan sharada elorda etnomádeni birlestikteriniń kórkemónerpazdar ujymy ózderiniń bai repertýarlary arqyly kórermenderge tól mádeniettiń qundylyqtaryna negizdelgen shyǵarmalardy oryndap berdi.
Esterińizge sala keteiik, biyl Qazaqstan Konstitýtsiiasyna 26 jyl. 1995 jyly 30 tamyzda jalpyhalyqtyq referendýmda elimizdiń negizgi qujaty Ata Zań qabyldanǵan bolatyn. Osyǵan orai, Qazaqstan halqy Assambleiasy ár óńirde Konstitýtsiia kúnin atap ótip jatyr.
