QR Prezidenti Ákimshiliginiń eks-jetekshisi Aslan Mýsin uly Asylbek Mýsinniń ólimine qatysty málimdeme jasady, dep jazady "Ult aqparat" serke.org saityna silteme jasap.
Qazaqstandaǵy ratsionaldy monoteizmniń negizin salýshy, filosof Asylbek Mýsinniń qaitys bolǵanyna qyryq kúnnen asty. Marqumdy eske alý úshin onyń dostary men týystary filosoftyń dúnietanym jónindegi kózqarasyn baiandaityn film jasady.
Filmniń kirispe bóliminde Asylbektiń ákesi, memleket qairatkeri Aslan Mýsin súiikti úlken ulynyń mezgilsiz qazaǵa ushyraǵan tusynda qaiǵysyna ortaqtasyp, moraldyq qoldaý bildirgen barsha jurtqa alǵys aitty. Onyń aitýynsha, Asylbek Mýsin dúnieni tanyp-bilýge talpynyp, adam bolmysy men adamzat tanymy jónindegi filosofiialyq oiǵa aýqymdy úles qosyp, óziniń artynda mol mura qaldyrdy. Gollandiiada Asylbek Mýsinniń basshylyǵymen adamzat tarihynda jinaqtalǵan gýmanitarlyq, filosofiialyq, ǵylymi oilar 114 tomǵa toptastyryldy, ony zertteitin jáne júieleitin «Monoteizm institýty» quryldy. «Monoteizm institýtyna» birikken álem ǵalymdary Quran, Injil, Taýrat jáne taǵy basqa da kieli kitaptardy oqyp túsinetin ámbebap sózdik jasaýdy jalǵastyryp jatyr. Asylbek Mýsin jáne onymen pikirles dostary dúnieni tanyp-bilýdiń ratsional monoteizm filosofiiasynyń metodologiiasyna negizdelgen júzdegen saǵattyq sapaly aýdio-video materialdaryn daiyndap ketti.
Asylbek Mýsin 1979 jyly týǵan. Ekonomika salasy boiynsha joǵarǵy bilim alǵan ol jastaiynan din máselesin jan-jaqty zerttegen filosof ǵalym. Onyń esimi Qazaqtanda «Izgi amal» pikirlester klýbymen, bylaiǵy jurt «quranshylar» dep ataityn islami aǵymmen tyǵyz bailanysty. Asylbek Mýsin osy aǵymnyń kóshbasshy ideology sanalady. Ol dini-tanymdyq taqyryptardy qamtityn ruh.kz, anti-idol.kz, nurmura.kz internet saittaryna basshylyq jasady.
Qazaqstandyq ratsional monoteisterdiń («quranshylardyń») pikiri boiynsha, Qudaidyń adamǵa jasaǵan eń úlken syiy – Aqyl. Iaǵni, adam Qudaidyń syiyn - Aqyldy paidalanýy mindetti, Aqiqatty Aqyl arqyly tanýy qajet. Buǵan qosymsha retinde Qudai adamdar jolbasshy etsin dep Kitap jiberdi. Quran – bári qamtylǵan, tolyq ári anyq baiandalǵan kitap. Sondyqtan, Qurandy túsindiretin, Aqiqatty tanýǵa kómektesetin qosymsha kitaptardyń, mazhabtardyń, tariqattardyń, áýlielerdiń, hadisterdiń jáne t.b. qajeti joq.
Aqiqatty izdeýdiń eń úzdik joly – ǵylym men filosofiia. Ár nársege syn kózben qarap daǵdylanbai naǵyz bilimge jetý múmkin emes. Aqiqat týrasyndaǵy derek synsyz, dálelsiz qabyldanar bolsa, onyń qundylyǵy men paidasy kúmándi.
Árbir esi durys adamnyń Qurandy óz betinshe oqyp-bilýge, sol arqyly Aqiqatty tanýǵa shamasy jetedi. Óitkeni, adamda Aqyl bar. Aqiqatty tanyp-bilýde Aqyl – qural (instrýment), Quran – nusqaýlyq (instrýktsiia). Bul metodologiia boiynsha, barlyq nárseni Aqylǵa salyp, zertteý kerek, dálel tabylyp jatsa ǵana, ol Aqiqat retinde qabyldanýy qajet.
