Bilik partiiasynyń atqarýshy hatshysy Ashat Oralov óziniń Facebook paraqshasynda partiianyń ataýy resmi túrde ózgertilgenin aityp, onyń «AMANAT» dep atalýynyń sebebin túsindirdi, - dep habarlaidy "Ult aqparat".
"Búgin partiiamyzdyń kezekten tys 22-shi Sezi onlain formatta ótip, oǵan elimizdiń túkpir-túkpirinen 393 delegat qatysty.
Týra 23 jyl buryn 1 naýryzda partiianyń quryltai Sezi ótkenin bilesizder. Dál osy kúnge orailastyrylǵan búgingi jiynnyń partiia tarihyndaǵy orny bólek. Sebebi biz búgin Partiia Tóraǵasynyń 28 qańtarda ótken Sezde modernizatsiialaý boiynsha bergen tapsyrmasy aiasynda daiyndalǵan baǵdarlamany talqyladyq, ony Sezd delegattary biraýyzdan maquldady.
Osyǵan orai Parlament Májilisindegi «Nur Otan» partiiasy Fraktsiiasynyń Tóraǵasy Erlan Jaqanuly Qoshanov partiia ataýyn «AMANAT» dep ózgertý týraly usynys bildirdi. Memleket basshysy, Partiia Tóraǵasy Qasym-Jomart Kemeluly Toqaev bul usynysqa qoldaý bildirdi, partiianyń jańa ataýyn Sezd delegattary da biraýyzdan qoldady. Sezd sheshimimen partiianyń Jarǵysyna tiisti ózgerister engizilip, jańa ataýy men belgisi bekitildi" - dep jazdy Oralov.
Onyń aitýynsha, "bul – Jańa Qazaqstandy qurý jolynda jańarǵan partiiaǵa berilgen airyqsha jaýapkershilik pen kórsetilgen zor senim".
"Sonymen, partiiamyzdyń «AMANAT» dep atalýynyń sebebin qysqasha aityp ótsem.
Birinshiden, «AMANAT» – memleket múddesi úshin tarihi jaýapkershilikti alǵan partiia.
Táýelsiz memleketimiz, elimiz ben jerimiz – ata-babamyzdyń bizge qaldyrǵan amanaty. Osy amanatty halyq igiligi úshin saqtap qalý, keler urpaqtarǵa jetkizý – el tutqasyn ustaǵan bas partiia úshin eń úlken jaýapkershilik.
Ekinshiden, «AMANAT» – halyq murasyn saqtaýshy partiia.
Tamyry tereń tarihymyz, mádenietimiz ben ádebietimiz, tilimiz ben salt-dástúrimiz – Táýelsiz Qazaqstannyń barsha azamattarynyń murasy.
Osy murany birtutas eldiń ortaq múddesi úshin amanat retinde kózdiń qarashyǵyndai saqtap, damýyna jaǵdai jasaý – partiianyń iri mindetteriniń biri.
Úshinshiden, «AMANAT» – memlekettik múddege adal, qoǵam igiligine jumys isteitin partiia.
Halyq uǵymynda «amanatqa qiianat jasalmaidy», iaǵni amanatty saqtaýshy partiia músheleri – eń áýeli memleket múddesine adal azamattar.
Tórtinshiden, «AMANAT» – sailaýshylar amanatyn oryndaityn, halyq únine qulaq asatyn partiia.
Halyqtyń úni – sailaý kezinde azamattardyń talap-tilegi men partiiaǵa tapsyrǵan amanattary. Olar sailaýaldy baǵdarlamaǵa engizildi. Partiia sailaýshylardyń amanatyn oryndaý arqyly elge qyzmet etedi. Barlyq aimaqtardaǵy qabyldaý bólmeleri men qoǵamdyq keńesteri arqyly halyqtyń muń-muqtajyna qulaq túrip, bilik organdaryna jetkizip, oń sheshim qabyldanýyna yqpal etedi.
Besinshiden, «AMANAT» – qoǵamdaǵy áleýmettik ádildikti jaqtaityn, barsha azamattarǵa teń múmkindik berýdi qoldaityn partiia.
Biz bir-birine qoldaý bildiretin, myqtylary álsizderge járdem beretin, áleýmettik álsiz toptardyń múddesin qorǵaityn qoǵam qurýǵa umtylamyz. Amanat saqtalǵan jaǵdaida qoǵamda adamdar arasyndaǵy baýyrmaldyq, senim men meiirim kúsheiedi, el ishinde yrys-bereke uialaidy.
Altynshydan, «AMANAT» – otbasy qundylyqtaryn, qoǵamdyq birlikti nasihattaityn partiia.
Táýelsiz Qazaqstandy órkendetetin keler urpaq bolǵanda, ziialy, kózi ashyq, tárbiesi kórkem urpaqty tárbieleý – ata-ananyń, qoǵamnyń jáne memlekettiń moinyndaǵy amanat. Sondyqtan partiia otbasy institýtynyń berik bolýyna, ulttyq bala tárbiesine, ana men balanyń quqyǵynyń qorǵalýyna basa nazar aýdarady.
Jetinshiden, «AMANAT» – memleketti basqarýǵa kórsetilgen senim.
Bir ujymnyń qyzmetkerleri – basshyǵa, sailaýshylar – partiiaǵa, halyq – Prezidentke amanat.
Parlamentte, jergilikti máslihattarda konstitýtsiialyq basymdyqqa ie, Úkimet pen jergilikti atqarýshy bilikti qadaǵalaityn partiia retinde memleketti damytýǵa, ony ozyq elderdiń qataryna qosýǵa, halyq turmysyn jaqsartýǵa kúsh salamyz. Osy maqsat jolynda partiia Prezidenttiń qoǵamdyq-saiasi jáne áleýmettik-ekonomikalyq reformalaryn tolyqtai júzege asyrý úshin oǵan jan-jaqty qoldaý kórsetedi.
Jańarǵan partiiamyz atyna zaty sai bolady dep senemin. Alǵys aitý kúni qutty bolsyn! Memleket pen halyq igiligine jasaǵan qyzmetterińiz úshin myń alǵys!" - dedi tarqatty partiianyń atqarýshy hatshysy.
