Elordadaǵy Qalibek Qýanyshbaev atyndaǵy Memlekettik akademiialyq qazaq mýzykalyq drama teatryna direktor bolyp Ashat Maemirov taǵaiyndaldy, dep habarlaidy Elorda Info.
Ashat Maksimuly 1974 jyly 12 naýryzda Batys Qazaqstan oblysynda dúniege kelgen.
1991-1995 jyldary Batys Qazaqstan memlekettik ýniversitetiniń filologiia fakýltetinde bilim alǵan.
1996 jyly T.Júrgenov atyndaǵy Qazaq ulttyq óner akademiiasyn drama rejisseri mamandyǵy boiynsha bitirdi.
Eńbek jolyn 1997 jyly Batys Qazaqstan oblystyq qazaq drama teatrynda akter bolyp bastady. Keiin qoiýshy-rejisser, oblystyq halyq sharýashylyǵy ortalyǵynda bas rejisser bolyp jumys istedi. Budan soń Batys Qazaqstan memlekettik ýniversitetinde oqytýshy, Qurmanǵazy atyndaǵy Oral mýzykalyq kolledjiniń akter sheberligi bóliminiń meńgerýshisi, «Qazaqstannyń rýhani damý qory» AQ vitse-prezidenti, QR Mádeniet jáne sport ministrliginiń janyndaǵy «Qazaq áýenderi» AQ prezidenti bolyp qyzmet etti.
2008 jyly «Bolashaq» halyqaralyq stipendiiasymen Sorbonna ýniversitetinde jáne Parij ulttyq óner konservatoriiasynda bilimin jetildirdi. 2010 jyly Resei teatr óneri institýtynyń magistratýrasyn támamdady.
2017 jyldyń 12 mamyrynda QR Mádeniet jáne sport ministriniń buiryǵymen «Qazaqkontsert» óner birlestiginiń bas direktory bolyp taǵaiyndaldy.
2018 jyldyń 12 aqpanynda M.Áýezov atyndaǵy Qazaq memlekettik akademiialyq drama teatryna jetekshilik etti.
Buǵan deiin A.Maemirov T.Júrgenov atyndaǵy Qazaq ulttyq óner akademiiasynyń rektory qyzmetin atqardy.
Aita keteiik, «Qalleki» teatryn buǵan deiin Jaýdyr Aibolat basqarǵan bolatyn.
