Elordadaǵy Abý-Dabi Plaza saýda ortalyǵyndaǵy vaktsinalaý beketinde Nur-Sultan qalasy ákimdiginiń mýzykalyq jas kórermen teatrynyń bir top ártisi vaktsina aldy, - dep habarlaidy QazAqparat.
Astanadaǵy Abý-Dabi Plaza saýda ortalyǵynda koronavirýsqa qarsy vaktsinalaý jumystary úzdiksiz júrip jatyr. Búgin solardyń arasynda Nur-Sultan qalasy ákimdiginiń mýzykalyq jas kórermen teatrynyń ujymy da bar. Óner salasynyń ókilderin teatr direktory Ashat Maemirov bastap kelipti.
«Búgin erekshe kún. Nur-Sultan qalasy ákimdiginiń mýzykalyq jas kórermen teatryndaǵy áriptesterimizben birge Abý-Dabi Plaza kesheninde vaktsina aldyq. «Spýtnik V» degen vaktsinany alýdy durys dep uiǵardyq. Biz kórermendermen tikelei jumys isteimiz, halyqtyń ortasynda júremiz. Sondyqtan ártisterge, óner adamdaryna mindetti túrde saqtaný kerek», - deidi teatr basshysy.
Ol, sondai-aq, «Spýtnik V» vaktsinasynyń tiimdiligi týraly dostary men áriptesterinen estigenin aitady. Sol aqparattyń shyndyǵyna is júzinde kóz jetkizgen teatr ókili qazaqstandyqtardy vaktsina laýǵa shaqyrdy.
«Qazir ǵana alyp shyqtym. Eshqandai jan aýyrtatyndai, tándi aýyrtatyndai áserin baiqaǵan joqpyn. Izaril, AQSh, Ulbyritaniia siiaqty órkenietti elderdiń kóbi vaktsina alýda alǵa shyǵyp jatyr. Óz kezeginde men de otandastarymdy vaktsina alýǵa shaqyramyn. Ótken ǵasyrlardyń basynda da osyndai indet taraǵan kezder bolǵan. Sonyń bárin adamzat ár túrli vaktsinalardy oilap taýyp, jeńip otyrǵan. Meniń uǵymymda pandemiia kezinde ultty, eldi, memleketti saqtaýdyń birden-bir joly – vaktsina alý. Ózim bir jyl buryn osy koronavirýspen qatty aýyryp jazylǵanmyn. Sondyqtan, biyl ekinshi ret qaitalanbaýy úshin ekinshi ret ekpe saldyryp jatyrmyn», - dedi Ashat Maemirov.
Osy teatrdyń jetekshi akteri, tanymal kino akteri Asylhan Tólepov te «Spýtnik V» vaktsinasyn tańdaǵanyn aitty.
«Búgin men úshin rasymen erekshe kún. Óitkeni men ózim tańdaý jasap, vaktsina alamyn degen sheshimge keldim. Densaýlyq kerek, kútiný kerek. Ainalamyzǵa da bizdiń qaýipsiz bolǵanymyz qajet. Árbir iske syn aitpas buryn, birinshi ózińdi túzeý kerek qoi. Otbasy músheleriniń arasynda eń birinshi men bastap turmyn. Mamandardan keńes aldym, bárin túsindirdi. Jańa ekpe salǵan mamandar da vaktsinadan keiin úshi kún jýynbaý kerek degen siiaqty erejelerin aityp jatyr», - deidi akter.
Asylhannyń oiynsha, vaktsina alý týraly sheshimdi árkim ózi qabyldaýy kerek. Óitkeni aqparat neǵurlym kóp bolsa, onyń ótirik-shynyn eksheý de soǵyrlym qiyn.
«Ázirge vaktsinanyń eshqandai keri áserin sezgen joqpyn. Endi ekinshi dozany kúteý kerek. Bir jyl buryn dám sezbei, koronavirýstyń belgilerin aǵzamnan baiqaǵan bolatynmyn. Vaktsina týraly aqparat kóp qoi. Túrli video kelip jatady. Onyń bárin kóretin ýaqyt ta joq. Bireýdiń sózine qarap sheshim qabyldaýǵa bolmaidy dep oilaimyn. Sondyqtan ózime vaktsina alý kerek dep sheshtim. Óitkeni densaýlyq kerek, ózimizdi de, jaqyndarymyzdy da kútý d osydan bastalady. Bolashaqty oilaý kerek. Sol úshin vaktsina aldym», dep tolyqtyrdy akter.
Osy teatrdyń taǵy bir akteri Ermahan Aimahan da vakitsna alǵan kezde eshqandai aýyrsyný sezbegenin aitady.
«Árkimge densaýlyq kerek. Sondyqtan óz erkimizben alǵyzyp jatyrmyz. Men de otbasymda vaktsina alǵan birinshi adammyn. Mende vaktsina alýym kerek degen oi boldy. Sol oidy iske asyrdym. Kúmándanǵan sátter bolǵan emes. Bárimizge óz densaýlyǵymyz úshin vaktsina alý kerek dep oilaimyn», - deidi Ermahan.
Almatydaǵy T.Júrgenov atyndaǵy óner akademiiasynyń magistranty, elordadaǵy mýzykalyq jas kórermen teatrynda rejiserdiń assitenti retinde tájiribe jinaqtap júrgen Mekan Jumabaev vaktsina aýl týraly kópten beri oilap júrse de, buǵan deiin ýaqyy bolmaǵanyn aitady.
«Vaktsinaǵ alýǵa qashan ýaqyt shyǵar eken dep kútip júrgenime biraz boldy. Búgin sáti kelipti. Ujymdaǵy áriptesterimmen birge kelgenimiz de durys bolǵan siiaqty. Eshqandai áser baiqaǵan joqpyn. Qalypty jaǵdaidaǵydai sezimdemin. Óitkeni ishtei daiyn bolyp keldim. Memleket óz halqyna eshqashan jamandyq jasamaitynyn bilemiz ǵoi. Mynandai kúrdeli kezeńle tártipke baǵynýymyz kerek. Túrli videolar shyǵypty dep estimin. Sonyń kóbi meni ainalyp ótken siiaqty. Soǵan qaraǵanda kóńilinde kúdigi bar adamdar sondai aqparattardy ózderi izdep tabatyn siiaqty ǵoi. Ondai shyqqan jeri belgisiz dúnielerge asa mán bermeimin. Koronavirýspen ózi aýyrmasama da, jaqyndarym, tanystarym aýyrdy. Ishinde dúnieden ótip ketkenderi de bar», - deidi jas maman.
