Bilim jáne ǵylym ministri Ashat Aimaǵambetov Úkimetke «Tsifrlyq bilim» jobasyn iske asyrýdy usyndy, dep habarlaidy "Ult aqparat".
«Memleket basshysynyń bergen tapsyrmalaryna sáikes biz «Tsifrlyq bilim» aýqymdy jobasyn iske asyrýdy usynamyz. Jobanyń ereksheligi qandai? Joba negizgi úsh baǵytty qamtidy.
Birinshi - bazalyq tsifrly quzyret. Barlyq azamattarǵa baǵyttalǵan. Mundai baǵdarlamalardyń mazmunyna: kúndelikti ómir úshin qajet IT quraldardy paidalaný, tsifrlyq ortada baǵdarlaý, qarapaiym IT ónimderin jasaý siiaqty daǵdylar kiredi.
Ekinshi - mamandandyrylǵan IT-kadrlardy daiarlaý. Naryqtyń suranysyna sáikes joǵary sapaly, IT salasyn tereń igergen 320 myń maman daiyndaý kózdelip otyr.
Úshinshi - basqa sala jumyskerlerin IT quzyretpen uiqastyryp daiarlaý. Bul rette barlyq salanyń bilim alýshylary IT quzyretin óz mamandyǵymen qosa paidalanatyn deńgeide meńgeredi», - dedi Ashat Aimaǵambetov
Úkimet otyrysynda. Ministrdiń aitýynsha, mysaly meditsina, aýyl sharýashylyǵy, qurylys, zańtaný jáne basqa da salada oqityn stýdentter osy tsifrlyq quzyretti igerip, pánaralyq maman bolyp shyǵady.
«Osy jobanyń nátijesinde tereń IT bilimi bar jańa mamandar shyǵarylady. Atalǵan jobanyń sheńberinde jyl saiyn 400 myńnan astam kadr «tsifrlyq quzyretke» ie bolyp shyǵarylady. Osylaisha, 2030 jyly ár deńgeidegi oqý oryndary jańa formatsiiadaǵy 3 millionnan astam maman daiarlaidy», - dedi ol.
