QR Áskeri soty Áskeri-teńiz kúshteriniń burynǵy bas qolbasshysy, vitse-admiral Jandarbek Januzaqov jazanyń jeńildetilý sebebin túsindirdi, dep habarlaidy "Ult aqparat".
«Áleýmettik jeli qoldanýshylary ÁTK-niń burynǵy bas qolbasshysy J.Januzaqovqa qatysty ótken protsess týraly pikir bildirip, keibir azamattar vitse-admiraldy ádiletsiz sottady dese, endi bireýleri úkimniń jeńil bolǵandyqtaryn aityp jatyr. Degenmen, mundai paiym qate. Qoǵamdy senimdi aqparatpen qamtamasyz etý maqsatynda 2020 jyldyń 18 mamyrynda Aqmola garnizony áskeri sotynyń úkimimen J.Januzaqov aýyr saldarǵa alyp kelgen bilikti asyra paidalanǵany úshin QK 450-baby 2-bólimimen sottalyp, 6 jylǵa bas bostandyǵynan aiyryldy. Aitalyq, 2012-2016 jyldary ÁTK áskeri kemeleri menshikti pirsi salynǵanǵa deiin shvartovka jasaý úshin jekemenshik ailaqtardy jaldaýǵa májbúr boldy. Oǵan memlekettik satyp alýlar konkýrsyn ótkizý úshin memleketten aqsha bólindi. Degenmen, J.Januzaqov Áskeri-teńiz kúshteriniń bas qolbasshysy bola turyp, konkýrs ótkizbesten bir kózden «S.» JShS-imen kelisimshart jasasqan. Teńizdiń jaǵalaýynda jalǵa beriletin ailaqtar kóp bolǵandyǵyna, onyń ústine quny joǵary, sonymen qatar tómen bolǵandyǵyna qaramastan J.Januzaqov negizsiz «S» JShS-ine basymdyq berip, sol arqyly memleketke 29 mln teńgeden astam materialdyq shyǵyn ákelgen. J.Januzaqovtyń atalǵan áreketi bilikti asyra paidalaný retinde durys jiktelgen», - dedi áskeri sottan.
Vedomstvo málimetinshe, appeliatsiialyq satyda jaza taǵaiyndaý kezinde tergeý organdary sottalýshynyń áreketinen paidakúnemdiktiń bolǵanyn dáleldei almaǵan. Sonymen qatar iske qatysty kámeletke tolmaǵan balanyń bolýy, aiyptaý kóleminiń qysqarýy syndy jazany jeńildetetin jaittar da bolǵan.
Buǵan qosa, Qorǵanys ministrliginiń Bas shtaby J.Januzaqovtyń uzaq jyldar áskeri qyzmette bolǵanyn, Qazaqstannyń Áskeri-teńiz kúshteriń qurý jáne damytýdaǵy zor eńbegin eskere kele jazany jeńildetý týraly ótinish joldaǵan. Osyǵan orai appeliatsiialyq soty J.Januzaqovty bas bostandyǵynan aiyrý jazasyn 5 jylǵa bas bostandyǵyna shekteý jazasymen aýystyrǵan.
