Qazaqstannyń Qarýly Kúshterinde barlyq sanattaǵy áskeri qyzmetshiler óz mamandyǵy boiynsha daiyndyqtan ótip jatyr, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Negizgi maqsat – áskeri qyzmetshilerdiń jeke quramynyń fýnktsionaldyq mindetterin, shtattyq qarý-jaraq pen áskeri tehnikany zerdeleýdi, atýdy, shtattyq bailanys quraldarymen jumys isteýdi jáne alǵashqy meditsinalyq kómek kórsetýdi úiretý.
Dárister árbir áskeri mamandyq boiynsha jeke ótkiziledi. Áskeri qyzmetshiler oqý tobynyń quramynda jumys isteidi. Oqytýdy halyqaralyq saiys pen oqý-jattyǵýǵa qatys yp, júldeger atanǵan tájiribeli áskeri mamandar, nusqaýshylar júrgizedi.
Máselen, tank bólimshelerinde kózdeýshi-operator siiaqty mamandar bar. Olar berilgen nysanany dál jáne naqty joiyp, ekipaj quramynda úilesimdi jumys istei alýy tiis. «Shyǵys» óńirlik qolbasshylyǵynda áskeri qyzmetshilermen osy mamandyq boiynsha «Tank biatlony» áskeri halyqaralyq oiyndarynyń qatysýshysy jáne birneshe dúrkin júldegeri, kózdeýshi-operator, aǵa serjant Dmitrii Alkenov jumys isteidi. 2017 jyly qazaqstandyq tankister komandasy osy iri jarysta ekinshi oryn alsa, al 2019 jyly úshinshi oryndy ielendi.
«Mamandyq boiynsha daiyndyq kezinde biz nysanashy-operatorlarǵa zeńbirekten atý jáne onymen qosarlanǵan pýlemetten atý erejelerin úiretýimiz kerek. Negizinen kózdeýshi-operatordyń is-áreketi aitarlyqtai fizikalyq júktememen bailanysty. Sonymen qatar, ol tank ekipajynyń múshelerimen tikelei jáne tehnikalyq qurylǵylardyń kómegimen turaqty bailanysta bolýy tiis. Bul qasietterdiń barlyǵy áskeri qyzmetshiniń kásibiligin arttyrý jáne óz mamandyǵy men urystaǵy maqsatyn durys túsiný úshin qajet», – dep atap ótti ol.
«Shyǵys» óńirlik qolbasshylyǵy áskerleriniń qolbasshysy, polkovnik Asan Júsipov atap ótkendei, búgingi tańda daiyndyqtan shamamen 700 áskeri qyzmetshi ótýde. Olarǵa 500 oqý toby men 1100-den asa tájiribeli nusqaýshy-serjant tańdap alynyp, oqý-materialdyq baza, áskeri tehnika men oq-dári bólingen.
Elimizdiń Qarýly Kúshterinde tek saýatty, óz isin jetik biletin joǵary bilikti mamandar qyzmet etýi tiis. Ol meili snaiper, ushqysh nemese tankist bolsyn. Sondyqtan áskeri qyzmetshilerdiń jaýyngerlik daiarlyǵynyń jeke túri retinde arnaiy daiyndyqqa erekshe kóńil bólinedi.
