Qairat Tashenov
Qaza tapqan Qairat Táshenovtiń anasy videoúndeý jasap, ulynyń ólimi úshin eshkim zań aldynda jaýap bermegenin aitty. Mamyrda jigittiń qaitys bolǵanyna bir jyl bolady, al kúdikti sanalatyn áskeri qyzmetshige qatysty qylmystyq is sozylyp ketken, - dep habarlaidy Tengrinews.kz.
Naǵila Táshenova videoúndeý jasaǵan. Áiel jalǵyz ulyn joǵaltqanyn aityp, onyń ólimine kináli adamdardyń zań boiynsha jazalanýyn talap etip otyr.
"Oqiǵa byltyr 27 mamyrda boldy. Jaqynda bir jyl bolady. Qarapaiym qylmystyq is sozylyp ketti, 4 ret toqtatyldy. Qylmys retinde sanalmaitynyn aitady. Olar ulymnyń velosipedi buzylǵanyna sendirýge tyrysty. Tipti ulym ózi turǵan kólikke soqtyǵysqan degen nusqalar da boldy. Sodan keiin kólik saǵatyna 24 shaqyrym jyldamdyqpen júrgenin aitty. Biraq bul - absýrd. Osyndai jyldamdyqpen júrse, ulym mundai jaraqat almas edi. Ulymnyń qabyrǵasy synǵan, keýdesine zaqym kelgen. Olar dereý jedel járdem shaqyrýy kerek edi. Dárigerler ýaqyt joǵaltqanyn aitty", - dedi Naǵila Táshenova.
Sondai-aq, jábirlenýshi ulyn qaǵyp óltirgen áskeri qyzmetshiler sol keshte mas bolǵanyn aitty. Áieldiń aitýynsha, bul tergeý barysynda anyqtalǵan.
"Sol kúni áskeri qyzmetshi men onyń dosy kólikte syra ishkenin kórgen kýágerler bar. Janynda taǵy bir qyz bolǵan. Olar politseilerdiń qýǵanynan jasyrynýǵa tyrysyp, shamdaryn sóndirip tastap, ulymdy qaǵyp ketken.
Kýágerler áskeri qyzmetshiler ulymdy qaǵyp ketken soń ony kóterýge tyrysqanyn kórgen. Olar ne istegisi kelgenin de bilmeimin. Istiń sotqa joldanǵanyn jáne kinálilerdiń zań boiynsha jazalanǵanyn qalaimyn", - dep tolyqtyrdy Naǵila Táshenova.
IIM baspasóz qyzmeti ókili qazir sotaldy tergeý merzimi toqtatylǵanyn aitty.
"Biyl 26 aqpanda sotaldy tergeý merzimi sot-fototehnika saraptamasy júrgizilýine bailanysty toqtatyldy. Saraptama aiaqtalǵannan keiin is boiynsha túpkilikti sheshim qabyldanyp, tergeý qaita bastalady. QR QIJK 201-baby 1-bóliginde kózdelgen sotaldy tergep-tekserý derekterin jariia etýge jol berilmeýine bailanysty tolyq aqparat berilmeidi", - dep jaýap berdi vedomstvo qyzmetkeri.
