قايرات تاشەنوۆ
قازا تاپقان قايرات تەشەنوۆتٸڭ اناسى ۆيدەوٷندەۋ جاساپ, ۇلىنىڭ ٶلٸمٸ ٷشٸن ەشكٸم زاڭ الدىندا جاۋاپ بەرمەگەنٸن ايتتى. مامىردا جٸگٸتتٸڭ قايتىس بولعانىنا بٸر جىل بولادى, ال كٷدٸكتٸ سانالاتىن ەسكەري قىزمەتشٸگە قاتىستى قىلمىستىق ٸس سوزىلىپ كەتكەن, - دەپ حابارلايدى Tengrinews.kz.
ناعيلا تەشەنوۆا ۆيدەوٷندەۋ جاساعان. ەيەل جالعىز ۇلىن جوعالتقانىن ايتىپ, ونىڭ ٶلٸمٸنە كٸنەلٸ ادامداردىڭ زاڭ بويىنشا جازالانۋىن تالاپ ەتٸپ وتىر.
"وقيعا بىلتىر 27 مامىردا بولدى. جاقىندا بٸر جىل بولادى. قاراپايىم قىلمىستىق ٸس سوزىلىپ كەتتٸ, 4 رەت توقتاتىلدى. قىلمىس رەتٸندە سانالمايتىنىن ايتادى. ولار ۇلىمنىڭ ۆەلوسيپەدٸ بۇزىلعانىنا سەندٸرۋگە تىرىستى. تٸپتٸ ۇلىم ٶزٸ تۇرعان كٶلٸككە سوقتىعىسقان دەگەن نۇسقالار دا بولدى. سودان كەيٸن كٶلٸك ساعاتىنا 24 شاقىرىم جىلدامدىقپەن جٷرگەنٸن ايتتى. بٸراق بۇل - ابسۋرد. وسىنداي جىلدامدىقپەن جٷرسە, ۇلىم مۇنداي جاراقات الماس ەدٸ. ۇلىمنىڭ قابىرعاسى سىنعان, كەۋدەسٸنە زاقىم كەلگەن. ولار دەرەۋ جەدەل جەردەم شاقىرۋى كەرەك ەدٸ. دەرٸگەرلەر ۋاقىت جوعالتقانىن ايتتى", - دەدٸ ناعيلا تەشەنوۆا.
سونداي-اق, جەبٸرلەنۋشٸ ۇلىن قاعىپ ٶلتٸرگەن ەسكەري قىزمەتشٸلەر سول كەشتە ماس بولعانىن ايتتى. ەيەلدٸڭ ايتۋىنشا, بۇل تەرگەۋ بارىسىندا انىقتالعان.
"سول كٷنٸ ەسكەري قىزمەتشٸ مەن ونىڭ دوسى كٶلٸكتە سىرا ٸشكەنٸن كٶرگەن كۋەگەرلەر بار. جانىندا تاعى بٸر قىز بولعان. ولار پوليتسەيلەردٸڭ قۋعانىنان جاسىرىنۋعا تىرىسىپ, شامدارىن سٶندٸرٸپ تاستاپ, ۇلىمدى قاعىپ كەتكەن.
كۋەگەرلەر ەسكەري قىزمەتشٸلەر ۇلىمدى قاعىپ كەتكەن سوڭ ونى كٶتەرۋگە تىرىسقانىن كٶرگەن. ولار نە ٸستەگٸسٸ كەلگەنٸن دە بٸلمەيمٸن. ٸستٸڭ سوتقا جولدانعانىن جەنە كٸنەلٸلەردٸڭ زاڭ بويىنشا جازالانعانىن قالايمىن", - دەپ تولىقتىردى ناعيلا تەشەنوۆا.
ٸٸم باسپاسٶز قىزمەتٸ ٶكٸلٸ قازٸر سوتالدى تەرگەۋ مەرزٸمٸ توقتاتىلعانىن ايتتى.
"بيىل 26 اقپاندا سوتالدى تەرگەۋ مەرزٸمٸ سوت-فوتوتەحنيكا ساراپتاماسى جٷرگٸزٸلۋٸنە بايلانىستى توقتاتىلدى. ساراپتاما اياقتالعاننان كەيٸن ٸس بويىنشا تٷپكٸلٸكتٸ شەشٸم قابىلدانىپ, تەرگەۋ قايتا باستالادى. قر قٸجك 201-بابى 1-بٶلٸگٸندە كٶزدەلگەن سوتالدى تەرگەپ-تەكسەرۋ دەرەكتەرٸن جارييا ەتۋگە جول بەرٸلمەۋٸنە بايلانىستى تولىق اقپارات بەرٸلمەيدٸ", - دەپ جاۋاپ بەردٸ ۆەدومستۆو قىزمەتكەرٸ.
