Qazaqstan Respýblikasynyń Qarýly kúshteriniń ofitseri, meditsina qyzmetiniń podpolkvonigi Sáýlet Qaldashov «Qazaqstannyń 100 jańa esimi» jobasynyń úshinshi kezeńiniń jeńimpazy atandy. Ofitser jaqynda ǵana Livandaǵy bitimgershilik missiiadan oralǵan, dep habarlaidy QazAqparat tilshisi.
Sáýlet Qaldashov 2002 jyldan beri áskeri meditsina salasynda qyzmet etedi. Kópbalaly otbasynyń otaǵasy.
«Men BUU missiiasyna elimizdiń tarihynda alǵashqy bolyp qatysýshy áskeri dárigermin. Biz serjanttar men ofitserlerden, áskeri dárigerlerden quralǵan 120 adam – qazaq rotasy jaqynda ǵana Livandaǵy bitimgershilik missiiadan sátti oraldyq. Missiia basshylyǵy tarapynan qyzmetimizdiń nátijesinde joǵarǵy nátijedegi sheber jáne basqalarǵa úlgi tutarlyq qazaq jaýyngeri degen iltipatqa ie boldyq», - dedi ol.
Sáýlet Qaldashovtyń aitýynsha, áskeri dárigerler urys dalasynda moinyna qarý asynyp, qarapaiym meditsinalyq sómkemen sarbazdardyń janynda júredi.
«Missiiadaǵy bir jyl ishinde jergilikti Livan halqyna, sheteldik áskerilerge alǵashqy meditsinalyq kómek kórsettik. Meditsinalyq evakýatsiiany uiymdastyrdyq. Bir sózben aitqanda, jergilikti halyqtyń jedel járdemi bola bildik. Men kórgen Livan jetpisinshi jyldardyń aiaǵyna deiin gúldengen el bolsa, qazir dinder men konfessiialardyń arazdyǵynan halqy jik-jikke bólinip, kórshi memlekettermen qarym-qatynasyn ornata almai, berekesi qashqan el. Dáriger retinde biletinim: soǵys zardabynan alǵan psihologiialyq jaraqat halyqtyń sanasynan ketpeitini ras. Osynyń bárin kórip, túigenim: bizdiń Qazaqstannyń basty bailyǵy - beibitshilik pen tatýlyq eken», - dedi ol.
Eske sala ketsek, elordada «Qazaqstannyń 100 jańa esimi» jobasynyń úshinshi kezeńi ótti. «Qazaqstannyń jańa esimderi» jobasynyń maqsaty - táýelsizdik jyldary Qazaqstannyń damýyna eleýli úles qosqan adamdardyń tarihy mysalynda tabystylyq, básekege qabilettilik, pragmatizm jáne bilimge tabyný ideialaryn ilgeriletý. Biyl jobaǵa qatysý úshin 1673 anketa qabyldanǵan. Jalpy, barlyq qatysýshyǵa 700 myńnan asa daýys berilgen. Barlyq kezeńniń qorytyndysy boiynsha biyl 32 jeńimpaz anyqtaldy.
.jpeg)