Túrkistan oblysynyń áskeri bóliminen qarý-jaraqtardy urlap qashqan áskeri qyzmetshiniń tórtinshi sybailasy ustaldy. Sondai-aq urlanǵan qarý tolyq kólemde tabyldy, dep habarlaidy "Ult aqparat" Polisia.kz saityna silteme jasap.
«Búgin QR Ishki ister ministrligi men Ulttyq qaýipsizdik komiteti qyzmetkerleriniń jedel-tergeý toby áskeri bólimnen qarý urlaǵan kishi serjant A. Balǵynbaidyń tórtinshi sybailasyn ustady.
Er adam politsiiadan tanysynyń úiinde jasyrynyp júrgen. Odan áskeri bólimnen urlanǵan eki «Makarov» tapanshasy men travmatikalyq tapansha tárkilendi.
Buǵan deiin vedomstvoaralyq top qyzmetkerleri áskeri qyzmetshiden atys qarýyn satyp alǵan onyń úsh dosyn ustaǵan bolatyn.
Qylmys jasaǵannan keiin barlyq kúdiktiler bólinip, politsiiadan jasyrynyp júrgen. Sondyqtan ustaý birneshe aimaqta: Almaty, Shymkent jáne Túrkistan oblystarynda júrgizildi. Jedel-izdestirý is-sharalary barysynda qylmysqa qatysy bar barlyq adamdardy anyqtap, ustaý ǵana emes, sondai-aq olar urlanǵan barlyq qarýdy tárkileýge múmkindik týdy. Bul - 29 «Kalashnikov» avtomaty jáne 28 «Makarov» tapanshasy, travmatikalyq tapansha jáne 2 dana pyshaq. Búgingi tańda qarýdy qylmystyq maqsatta paidalaný qaýpi joq dep senimmen aitýǵa bolady», - delingen aqparatta.
Atap ótilgendei, qylmystyq ister boiynsha kúdiktiler retinde jalpy alǵanda 8 adam jaýapkershilikke tartylýda: tórt áskeri qyzmetshi (sonyń ishinde divizion komandiri) jáne A. Balǵynbaidyń sybailastary – tórt azamattyq tulǵa.
QR IIM Tergeý departamentiniń áskeri-tergeý basqarmasy sotqa deiingi tergeýdi jalǵastyrýda.
Esterińizge sala ketsek, 20 aqpan kúni Túrkistan oblysynda Áýe qorǵanysy kúshteriniń áskeri bólimshesinde kelisimshart boiynsha qyzmet etip júrgen kishi serjant A.Balǵynbai kezekshilikti óz betimen tastap shyǵyp, biraz qarý-jaraqty urlap ketken bolatyn. Sol kúni IIM jáne UQK qyzmetkerleriniń arnaiy jedel toby áskeri qyzmetshini qolǵa túsirdi. Keiin, 24 aqpanda A.Balǵynbaidyń eki sybailasy, 26 aqpanda taǵy bir sybailasy ustaldy. Qylmystyq ister qozǵaldy.
