QR Prezidenti Jambyl oblysynda bolǵan jarylystarǵa bailanysty shuǵyl jinalys ótkizdi. Jiynǵa Premer-Ministr, quqyq qorǵaý, qorǵanys, qaýipsizdik jáne basqa da kúshtik qurylymdardyń basshylary qatysty, dep habarlaidy "Ult aqparat" Aqordaǵa silteme jasap.
Qasym-Jomart Toqaev Jambyl oblysynda bolǵan tótenshe oqiǵa saldarynan qaza tapqan azamattardyń otbasylaryna kóńil aityp, zardap shekken adamdardyń tezirek saýyǵyp ketine tilektestik bildirdi.
– Keshe Jambyl oblysynyń Baizaq aýdanynda tótenshe oqiǵa boldy.
Qarýly Kúshterimizdiń oq-dárisi saqtalatyn qoimanyń birinen órt shyqty. Artynan birneshe jarylys boldy. Jergilikti turǵyndar aman-esen. Ókinishke qarai, áskeri qyzmetshiler men qutqarýshylar arasynda adam shyǵyny bar. Olar qyzmettik mindetin atqarý barysynda erlikpen qaza tapty. Qaitys bolǵan azamattardyń otbasyna qaiǵylaryna ortaqtasyp, kóńil aitamyn. Jaraqat alǵan adamdardyń tezirek saýyǵyp ketýin tileimin, – dedi Memleket basshysy.
Taǵy bir mańyzdy másele retinde apattyń sebepterin anyqtaý qajet ekenin aitty. Bundai jaǵdailardyń aldyn alý boiynsha naqty sharalar qabyldaýdy tapsyrdy.
Memleket basshysy eki jyl buryn Arysta bolǵan jarylysty eske alyp, qarý-jaraq qoimalarynda áli de sheshilmegen túiindi máselelerdiń bar ekenin aitty. Prezident Arys oqiǵasynan keiin arnaiy tapsyrma bergenin, endi osy baǵyttaǵy jumystardy jedeldetip aiaqtaýǵa tapsyrma berdi.
Qasym-Jomart Toqaev Jambyl oblysyndaǵy tótenshe oqiǵaǵa bailanysty birqatar sharalardy shuǵyl qolǵa alýdy tapsyrdy.
– Birinshi. Tótenshe jaǵdaidyń saldaryn joiý úshin vedomstvoaralyq memlekettik komissiia qurylsyn. Oǵan Premer-Ministrdiń orynbasary Roman Vasilevich Skliar basshylyq etsin. Roman Vasilevich, sizge qazir jinalys aiaqtalǵan soń Jambyl óńirine shuǵyl barýdy tapsyramyn. Jumystyń basy-qasynda bolyp, barlyq sharalardy oqiǵa ornynan uiymdastyryńyz. Ekinshi. Qaza bolǵan azamattardyń otbasyn áleýmettik qorǵaý jáne zardap shekken turǵyndarǵa kómek kórsetý úshin barlyq qajetti sharalar qabyldansyn. Úshinshi. Densaýlyq saqtaý ministrligi tótenshe oqiǵa saldarynan jaraqat alǵan azamattarǵa jan-jaqty meditsinalyq kómek kórsetýdi uiymdastyrsyn, – dedi Memleket basshysy.
Sondai-aq Bas prokýratýra men Ishki ister ministrligine oqys oqiǵanyń mán-jaiyn jáne kinálilerdi anyqtaý úshin sotqa deiingi tergeý amaldarynyń muqiiat júrgizýdi qamtamasyz etýdi, Ishki ister ministrligi múddeli memlekettik organdarmen birlesip, qoǵamdyq tártipti, azamattardyń qaýipsizdigi men dúnie-múlkiniń saqtalýyn qamtamasyz etý úshin keshendi sharalar qabyldaýdy tapsyrdy.
Ulttyq qaýipsizdik komitetine, Bas prokýratýraǵa jáne Ishki ister ministrligi men múddeli memlekettik organdarǵa oqiǵa týraly jalǵan aqparattyń taralýyna jol bermeý úshin sharalar qabyldaý jóninde tapsyrmalar berildi.
Jiynda, Qorǵanys ministri Nurlan Ermekbaev, Tótenshe jaǵdailar ministri Iýrii Ilin, Jambyl oblysynyń ákimi Berdibek Saparbaev, Ishki ister ministri Erlan Turǵymbaev jáne Bas prokýror Ǵizat Nurdáýletov baiandama jasady.
