Almatyda sarbazdyń qaza bolýyna ákep soqqan salǵyrttyq úshin batalon komandiriniń orynbasaryna sot úkimi shyqty, dep habarlaidy ult.kz.
Bas prokýratýra málimdeýinshe, is Almaty garnizonynyń áskeri sotynda qaraldy. Taldyqorǵan garnizonyndaǵy áskeri bólimderdiń birinde merzimdi áskeri qyzmet ótkergen sarbazdyń qaza bolýyna qatysty qylmystyq is boiynsha sot protsesi aiaqtalǵan.
Oqiǵa 2025 jyldyń 23 qyrkúieginde jeke quramnyń qarýmen jumys isteýi barysynda bolǵan. Atys kezinde pýlemetten abaisyzda oq atylyp, oq jaraqatyn alǵan qatardaǵy jaýynger kóz jumǵan.
Tergeý barysynda batalon komandiriniń orynbasary qarýdy paidalaný kezindegi qaýipsizdik talaptarynyń saqtalýyn qamtamasyz etpegeni anyqtaldy. Sondai-aq aldyńǵy atystardan keiin qarýdy tolyq tekserýdi uiymdastyrmaǵan. Sonyń saldarynan uńǵyda qalyp qoiǵan oq qaiǵyly jaǵdaiǵa sebep bolǵan.
Sot sheshimimen ol Qylmystyq kodekstiń 453-babynyń 2-bóligi boiynsha (aýyr zardaptarǵa ákep soqqan qyzmetke salǵyrt qaraý) kináli dep tanylyp, 4 jylǵa bas bostandyǵynan aiyryldy.
Úkim zańdy kúshine engen joq.
