«Otbasy Bank» «Áskeri baspana» baǵdarlamasyna qatysý týraly ótinimderdi onlain formatta qabyldai bastady, dep habarlaidy "Ult aqparat" «Otbasy banktiń» baspasóz qyzmetine silteme jasap.
Baǵdarlamanyń birinshi aiynda limit boiynsha 700-den astam áskeri qyzmetshiniń ótinimi qabyldandy, endigi ótinimder kelesi aida qabyldanady.
«Otbasy bank» turǵyn úi qurylys jinaq banki» AQ-da «Áskeri qyzmetshiler men arnaýly memlekettik organdar qyzmetkerlerin turǵyn úimen qamtamasyz etý» baǵdarlamasy («Áskeri baspana») boiynsha nesie berýdi bastady. Baǵdarlamaǵa turǵyn úi tólemderin alatyn, Otbasy bankinde arnaiy aǵymdaǵy shoty bar jáne buǵan deiin turǵyn úi tólemderin jyljymaityn múlik satyp alýǵa paidalanbaǵan kez kelgen azamat qatysa alady», - dep jazylǵan bank habarlamasynda.
Baǵdarlama boiynsha nesie alý sharttary ózgerissiz qaldy: alǵashqy/ekinshi naryqtan baspana satyp alý jáne jóndeý, alǵashqy jarna 15% -dan bastalady, paiyzdyq mólsherlemesi – 8%, jyldyq tiimdi syiaqy mólsherlemesi 8,3%-dan bastalady. Nesie merzimi 25 jylǵa deiin sozylady.
«Baspana tańdaýda eshqandai shekteý joq. Nesieni jańa nemese qoldanystaǵy turǵyn úidi satyp alý úshin paidalanýǵa bolady. Sondai-aq, menshiktegi turǵyn úidiń bolýyna qatysty da shekteýler qoiylmaǵan. Nesieniń ruqsat etilgen eń joǵarǵy somasyn klient tańdaýymen eki nusqada esepteýge bolady: ai saiynǵy turǵyn úidiń tólemderi men 15%-dan kem túspeitin depozitindegi jinaq somasyna súiene otyryp nemese klienttiń naqty kirisi men shyǵyndaryna negizdelýge bolady», - deidi bank.
«Áskeri baspana» baǵdarlamasy boiynsha nesie alý úshin, úsh qadamdy oryndaý qajet:
1) Internet-bankingte qatysýǵa ótinish berý (veb-nusqasy https://online.hcsbk.kz );
2) Turǵyn úi tabý;
3) Internet-bankingte ótinim qabyldanǵannan keiingi 60 kún ishinde bank bólimshesine baryp, nesie alýǵa ótinish berý.
Joldanǵan ótinimderdi (internet-bankingte) bank vedomstvo men aimaqtarǵa bólmei, belgilengen limit sheńberinde ai saiyn qabyldap otyrady. Eger turǵyn úi tólemderin alýshy osy aida qatysýǵa ótinim berip úlgermese, ony kelesi aida joldai alady. Internet-bankingke jiberilgen ótinim onyń merzimi aiaqtalǵansha, iaǵni 60 kún boiy joiylmaidy. Osy ýaqyt aralyǵynda turǵyn úi tólemderin alýshy baspana taýyp, nesie alýǵa ótinish berip úlgermese, qujat kúshin joiady. Bul jaǵdaida turǵyn úi tólemderin alýshy ony bankke qaita joldai alady.
«2020 jyly turǵyn úi tólemderin alyp, ony «Otbasy bankinde» úi alamyz dep jinap júrgen 2 362 qazaqstandyq áskeri qyzmetshi men arnaýly memlekettik organdar qyzmetkerleri «Áskeri baspana» baǵdarlamasy boiynsha jeńildetilgen sharttarmen jalpy somasy 51,8 mlrd teńgege nesie rásimdedi. Olardyń ishinde 1900-ge jýyǵy 15%-dyq alǵashqy jarnamen, jyldyq 8%-ben turǵyn úi zaimyn aldy», -deidi «Otbasy bank» AQ Basqarma tóraiymy Lázzat Ibragimova.
«Áskeri baspana» baǵdarlamasyna ótinim berý úshin «Otbasy bank» internet-bankinginde jeke kabinetke kirip, sol jaq paneldegi «Arnaiy shot» paraqshasyn ashý kerek. Ekranda kórsetilgen «Áskeri baspana» baǵdarlamasyna qatysýǵa ótinim berý» pernesin basyńyz. Paida bolǵan silteme boiynsha ótip, «Áskeri Baspana» baǵdarlamasynyń sharttarymen tanysyp, bastapqy betke qaita oralyp, «Ári qarai» komandasyn oryndaý kerek.
Óz óńirińizdi ári sizge yńǵaily «Otbasy Bankiniń» bólimshesin tańdap, «Ári qarai» batyrmasyn basyńyz. Baǵdarlama sharttarymen tanysqanyńyzdy rastaityn elektrondy ótinishke qol qoiyńyz. Ol úshin paida bolǵan terezede belgi qoiyp, «Ári qarai» batyrmasyn basyńyz. Mobildi nómirińizge arnaiy kody bar SMS joldanady. Ony uiashyqqa engizip, «Ári qarai» batyrmasymen kelesi qadamǵa ótińiz. Elektrondyq ótinimmen tanysyp, «Ári qarai» batyrmasy arqyly ótinim berýdi aiaqtańyz.
Eger bári sátti júzege assa, monitorǵa nesie alýǵa ótinish berý úshin bank bólimshesine júgine alatyn merzim (60 kún) kórsetilip, quttyqtaýy bar habarlama keledi. Sondai-aq internet-bankingtegi jeke kabinetińizdiń basty betinde «Áskeri Baspana» baǵdarlamasy boiynsha nesie alýǵa úmitker ekenińiz jáne bank bólimshesine júginý qajet ýaqyt aralyǵy kórsetilip turady. Bank bólimshesine barmai turyp, banktiń www.hcsbk.kz saity arqyly kezekke onlain jazylý qajet.
