Kórneki foto: QR Qorǵanys ministrligi Youtube arnasynan
QR Bas áskeri prokýrorynyń birinshi orynbasary Maqsat Qaziev áskerden jaltaryp, Reseige ketip qalǵan jastarǵa qatysty pikir bildirdi, dep habarlaidy QazAqparat.
Búgin Senatta áskeri qyzmetshilerdiń densaýlyǵyn talqylaý kezinde depýtat Sergei Ershov áskerden jaltarǵandar týraly surady.
«Buqaralyq aqparat quraldarynda áskerge barmaý úshin Soltústik Qazaqstannan Reseige qashyp barǵandar týraly málimet tarady. Máselen, qazirgi kezde kórshi memlekettiń aýmaǵynda kóktemgi áskerge shaqyrylatyn 250-ge jýyq azamat bar. Shynymen de jaǵdai osylai ma? Bul jigitterdiń taǵdyry ne bolady?» dep surady senator.
Óz kezeginde Bas áskeri prokýrordyń birinshi orynbasary Maqsat Qaziev osyndai derekter bar ekenin naqtylady.
«Rasynda da mundai aqparat BAQ-ta jariialanǵan. Prokýratýra organdary Qorǵanys ministrligine tiisti nusqaý berdi. 200 adamnyń 120-sy Resei Federatsiiasynda bilim alyp jatyr, iaǵni stýdent sanatyna jatady», - dedi Qaziev.
Osy oraida ol Qorǵanys ministrligi bul baǵytta tiisti is-qimyldy pysyqtap jatqanyn aitty.
«Eger olar shynymen kórshi elde oqýda júrgeni naqtylansa, onda bul jaǵdai áskerge barý merzimin keiinge shegerýge sebep bolady. Sondai-aq, bul jigitterdiń arasynda oqýǵa túspegenderi anyqtalsa, Qazaqstan aýmaǵyna kelgen kezde olar mindetinen jaltarǵany úshin aiyptalady», - dedi Bas áskeri prokýrordyń birinshi orynbasary.
