Jambyl oblysynda áskeri boryshyn ótep júrip, kóz jumǵan mańǵystaýlyq jas sarbaz Álibek Qalbaidyń qurmetine eskertkish ornatylmaq. Bul týraly Qazaqstan Qarýly kúshteri bas shtaby basshysynyń orynbasary, tárbie jáne ideologiialyq jumys departamentiniń basshysy, general-maior Serik Boranbaev málim etti, dep habarlaidy QazAqparat.
«Ókinishke qarai, biyl 22 sáýirde Mańǵystaý oblysynda ornalasqan áskeri gospitalde ásker qataryna shaqyrylǵan Álibek Qalbai qaitys boldy. Bolǵan oqiǵa jas sarbazdyń otbasymen qatar, barsha qarýly kúsh ujymyna aýyr tidi. Oqiǵaǵa qatysty belgili aqparattardy resmi túrde berdik. Búginde tiisti saraptama alyndy, tergeý amaldary júrip jatyr. Biz eshnárseni jasyrmaimyz. Mert bolǵan jas áskerdiń ata-anasy men týystary arnaiy kelip, áskeri bólimniń qyzmetimen tanysty», - dedi Serik Boranbaev Ortalyq kommýnikatsiialar qyzmeti alańynda ótken baspasóz máslihatynda.
Onyń aitýynsha, qaiǵyly jaittyń mán-jaiy tergeý nátijesinen soń belgili bolady.
«Qazirgi kezde belgilisi - sapta turǵan sarbaz basy ainalyp, esinen tanyp qalǵan. Al tolyǵyraq aita almaimyn, sondyqtan istiń aqyryn sabyrmen kúteiik. Jas sarbazdyń otbasyna qoldaý kórsetilip jatyr. Atap aitqanda, 500 AEK kóleminde qarjylai kómek taǵaiyndaldy. Sonymen qatar eskertkish qoiýǵa 80 AEK kóleminde qarjy qarastyryldy. Odan bólek, jeke quramnyń atynan qarjylai jáne basqalai da qoldaý kórsetildi», - deidi ol.
