Prezident Joldaýyndaǵy áskeri boryshtyń jastardyń ómirindegi ornyn nyǵaitý týraly bastamasy zaman talabynan týyndap otyr. QR Parlamenti Májilisiniń depýtaty, Qazaqstan Ardagerleri qaýymdastyǵynyń tóraǵasy Baqytbek Smaǵul osyndai pikir bildirdi, dep habarlaidy QazAqparat.
«Otandy qorǵaý – Ata zańymyzdyń 36-baby boiynsha, árbir er azamattyń paryzy da, qaryzy da. Biraq biz osy mindetti laiyqty atqaryp júrmiz be? Qazirgi jastar «áskerge barsam» degen baǵytta emes, kerisinshe, «áskerden qalsam» degen baǵytta júr. Kóbiniń oiy áskeri bilet tek jumysqa turý úshin kerek degenge saiady. Qazirgi almaǵaiyp kezeńde mektep qabyrǵasyndaǵy alǵashqy áskeri daiyndyq pániniń rólin kóterý kerek. Uldarymyzdy azamat retinde qalyptastyratyn quraldyń biri osy. Qazirgi «Jas sarbaz» jobasy da óte kerek. Kelisimshart boiynsha qyzmet etetin áskerilerdiń kóbi qazir armiiaǵa baryp, sol jerden qalyp jatyr. Soǵan balans ustaý úshin mektep qabyrǵasynda áskeri bilim men tárbieni sińirý mańyzdy», - dedi depýtat Ulttyq akademiialyq kitaphanada ótken baspasóz konferentsiiasynyń aldynda BAQ ókilderine bergen suhbatynda.
Qazaqstan Ardagerleri qaýymdastyǵynyń tóraǵasy áskeri boryshyn óteýden jaltarý jaittarymen ushyrasyp turatynyn aitady.
«Keide maǵan tanystar qońyraý shalady. «Balamdy áskerge shaqyryp jatyr edi, alyp qalýǵa bolmai ma» dep ótinip aitatyndar bar. Men olarǵa kerisinshe áskerge barý balanyń óz bolashaǵy úshin kerek ekenin túsindiremin. Áskerge baryp kelgen bala erteń ata-anaǵa masyl bolmaidy. Jigitke jigittik sipat beretin de ásker. Ol ómirden óz júgin kóterip óte alady. Áskerge barǵan qai bala bolsyn, jemqorlyqtan ada, otanyn súietin adam bolyp shyǵady. Jyraqta júrip ata-anasynyń, týǵan ólkesiniń qadirin jete túsinedi. Saiasi saýattylyq ta áskerde qalyptasady. Áskerde qarý atýdan basqa da kóp dúnie úiretiledi óitkeni. Osy turǵydan alǵanda Prezidentimiz Qasym-Jomart Toqaevtyń jastarǵa ómirdegi óz ornyn armiia qatarynda júrip tabatyndai jaǵdai jasaý týraly bastamasy óte oryndy dep oilaimyn», - degen Baqytbek Smaǵul bul iste ardagsherlerdiń memleketpen qanattasyp jumis istei alatynyn eske saldy.
«Oǵan bizdiń aýǵan soǵysynyń ardagerleri tiri úlgi retinde úles qosýǵa daiyn. Elimizde tuńǵysh ret «Ardagerler týraly» zańnyń qabyldanǵanyna da kóp bolǵan joq. Osy turǵydaǵy jumystar jalǵasyn tapsa, áskeri boryshyn abyroimen oryndaǵan azamattar laiyqty qurmet kórip jatsa, salaǵa degen qoǵamnyń kózqarasy, jastardyń áskeri boryshyn óteýge degen yntasy artady», - dedi Májilis depýtaty.
