پرەزيدەنت جولداۋىنداعى ەسكەري بورىشتىڭ جاستاردىڭ ٶمٸرٸندەگٸ ورنىن نىعايتۋ تۋرالى باستاماسى زامان تالابىنان تۋىنداپ وتىر. قر پارلامەنتٸ مەجٸلٸسٸنٸڭ دەپۋتاتى, Qazaqstan Ardagerleri قاۋىمداستىعىنىڭ تٶراعاسى باقىتبەك سماعۇل وسىنداي پٸكٸر بٸلدٸردٸ, دەپ حابارلايدى قازاقپارات.
«وتاندى قورعاۋ – اتا زاڭىمىزدىڭ 36-بابى بويىنشا, ەربٸر ەر ازاماتتىڭ پارىزى دا, قارىزى دا. بٸراق بٸز وسى مٸندەتتٸ لايىقتى اتقارىپ جٷرمٸز بە? قازٸرگٸ جاستار «ەسكەرگە بارسام» دەگەن باعىتتا ەمەس, كەرٸسٸنشە, «ەسكەردەن قالسام» دەگەن باعىتتا جٷر. كٶبٸنٸڭ ويى ەسكەري بيلەت تەك جۇمىسقا تۇرۋ ٷشٸن كەرەك دەگەنگە سايادى. قازٸرگٸ الماعايىپ كەزەڭدە مەكتەپ قابىرعاسىنداعى العاشقى ەسكەري دايىندىق پەنٸنٸڭ رٶلٸن كٶتەرۋ كەرەك. ۇلدارىمىزدى ازامات رەتٸندە قالىپتاستىراتىن قۇرالدىڭ بٸرٸ وسى. قازٸرگٸ «جاس سارباز» جوباسى دا ٶتە كەرەك. كەلٸسٸمشارت بويىنشا قىزمەت ەتەتٸن ەسكەريلەردٸڭ كٶبٸ قازٸر ارميياعا بارىپ, سول جەردەن قالىپ جاتىر. سوعان بالانس ۇستاۋ ٷشٸن مەكتەپ قابىرعاسىندا ەسكەري بٸلٸم مەن تەربيەنٸ سٸڭٸرۋ ماڭىزدى», - دەدٸ دەپۋتات ۇلتتىق اكادەمييالىق كٸتاپحانادا ٶتكەن باسپاسٶز كونفەرەنتسيياسىنىڭ الدىندا باق ٶكٸلدەرٸنە بەرگەن سۇحباتىندا.
Qazaqstan Ardagerleri قاۋىمداستىعىنىڭ تٶراعاسى ەسكەري بورىشىن ٶتەۋدەن جالتارۋ جايتتارىمەن ۇشىراسىپ تۇراتىنىن ايتادى.
«كەيدە ماعان تانىستار قوڭىراۋ شالادى. «بالامدى ەسكەرگە شاقىرىپ جاتىر ەدٸ, الىپ قالۋعا بولماي ما» دەپ ٶتٸنٸپ ايتاتىندار بار. مەن ولارعا كەرٸسٸنشە ەسكەرگە بارۋ بالانىڭ ٶز بولاشاعى ٷشٸن كەرەك ەكەنٸن تٷسٸندٸرەمٸن. ەسكەرگە بارىپ كەلگەن بالا ەرتەڭ اتا-اناعا ماسىل بولمايدى. جٸگٸتكە جٸگٸتتٸك سيپات بەرەتٸن دە ەسكەر. ول ٶمٸردەن ٶز جٷگٸن كٶتەرٸپ ٶتە الادى. ەسكەرگە بارعان قاي بالا بولسىن, جەمقورلىقتان ادا, وتانىن سٷيەتٸن ادام بولىپ شىعادى. جىراقتا جٷرٸپ اتا-اناسىنىڭ, تۋعان ٶلكەسٸنٸڭ قادٸرٸن جەتە تٷسٸنەدٸ. ساياسي ساۋاتتىلىق تا ەسكەردە قالىپتاسادى. ەسكەردە قارۋ اتۋدان باسقا دا كٶپ دٷنيە ٷيرەتٸلەدٸ ٶيتكەنٸ. وسى تۇرعىدان العاندا پرەزيدەنتٸمٸز قاسىم-جومارت توقاەۆتىڭ جاستارعا ٶمٸردەگٸ ٶز ورنىن ارمييا قاتارىندا جٷرٸپ تاباتىنداي جاعداي جاساۋ تۋرالى باستاماسى ٶتە ورىندى دەپ ويلايمىن», - دەگەن باقىتبەك سماعۇل بۇل ٸستە ارداگشەرلەردٸڭ مەملەكەتپەن قاناتتاسىپ جۇمٸس ٸستەي الاتىنىن ەسكە سالدى.
«وعان بٸزدٸڭ اۋعان سوعىسىنىڭ ارداگەرلەرٸ تٸرٸ ٷلگٸ رەتٸندە ٷلەس قوسۋعا دايىن. ەلٸمٸزدە تۇڭعىش رەت «ارداگەرلەر تۋرالى» زاڭنىڭ قابىلدانعانىنا دا كٶپ بولعان جوق. وسى تۇرعىداعى جۇمىستار جالعاسىن تاپسا, ەسكەري بورىشىن ابىرويمەن ورىنداعان ازاماتتار لايىقتى قۇرمەت كٶرٸپ جاتسا, سالاعا دەگەن قوعامنىڭ كٶزقاراسى, جاستاردىڭ ەسكەري بورىشىن ٶتەۋگە دەگەن ىنتاسى ارتادى», - دەدٸ مەجٸلٸس دەپۋتاتى.
