Aýyldar men qalalalardaǵy internet tarifinde aiyrmashylyq bolmaidy. Bul týraly Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev málim etti, dep habarlaidy "Ult aqparat".
Parlament Májilisindegi Úkimet saǵatynda tilshiler ministrden aýyldar men qalalalardaǵy internet tarifinde aiyrmashylyqtyń bolýy múmkindigin surady.
Óz kezeginde Asqar Jumaǵaliev aýyldy jerlerge tartylǵan internettiń tarifi qaladaǵymen birdei bolatynyn jetkizdi.
«Dál osyndai tarif bolady, sebebi qyzmet tariftik keste boiynsha usynylady. Búginde aýyl turǵyndaryna 5-6 ese qymbat internetti berý múmkin emes. Sondyqtan bul turǵyda salyqtyq jeńildik sharalary (kompaniialarǵa) eskeriledi», - dedi ministr.
Sonymen qatar, ol spýtniktik bailanys jelisi qymbat tehnologiia sanatyna jatatynyn atap ótti.
«Ony paidalanǵysy keletinderge biz tiisti múmkindikti beremiz. Bul qyzmet búginde aitarlyqtai qymbat. Osy oraida keń jolaqty internetpen basqa tehnologiialar esebinen qamtýdy eskerip otyrmyz. Degenmen talshyqty jeli tartylýy qiyndaý eldi mekender bar, iaǵni bul aýyldardy tek spýtniktik tehnologiiamen qamtamasyz etý múmkindigi bolady», - dedi Asqar Jumaǵaliev.
Budan buryn habarlanǵandai, Májiliste aýyldardy keń jolaqty internetke qosýdyń jospary baiandaldy.
Belgili bolǵandai, joǵaryda atalǵan jobalardy oryndaý jumystarynyń nátijesi boiynsha 2022 jyldyń sońyna deiin Qazaqstan Respýblikasy halqynyń 97 paiyzy keń jolaqty internet jelisimen qamtylatyn bolady. Qalǵan 3 paiyzyna spýtniktik tehnologiiany qoldaný múmkindigi qamtamasyz etiledi.
