اۋىلدار مەن قالالالارداعى ينتەرنەت تاريفٸندە ايىرماشىلىق بولمايدى. بۇل تۋرالى تسيفرلىق دامۋ, يننوۆاتسييالار جەنە اەروعارىش ٶنەركەسٸبٸ مينيسترٸ اسقار جۇماعاليەۆ مەلٸم ەتتٸ, دەپ حابارلايدى "ۇلت اقپارات".
پارلامەنت مەجٸلٸسٸندەگٸ ٷكٸمەت ساعاتىندا تٸلشٸلەر مينيستردەن اۋىلدار مەن قالالالارداعى ينتەرنەت تاريفٸندە ايىرماشىلىقتىڭ بولۋى مٷمكٸندٸگٸن سۇرادى.
ٶز كەزەگٸندە اسقار جۇماعاليەۆ اۋىلدى جەرلەرگە تارتىلعان ينتەرنەتتٸڭ تاريفٸ قالاداعىمەن بٸردەي بولاتىنىن جەتكٸزدٸ.
«دەل وسىنداي تاريف بولادى, سەبەبٸ قىزمەت تاريفتٸك كەستە بويىنشا ۇسىنىلادى. بٷگٸندە اۋىل تۇرعىندارىنا 5-6 ەسە قىمبات ينتەرنەتتٸ بەرۋ مٷمكٸن ەمەس. سوندىقتان بۇل تۇرعىدا سالىقتىق جەڭٸلدٸك شارالارى (كومپانييالارعا) ەسكەرٸلەدٸ», - دەدٸ مينيستر.
سونىمەن قاتار, ول سپۋتنيكتٸك بايلانىس جەلٸسٸ قىمبات تەحنولوگييا ساناتىنا جاتاتىنىن اتاپ ٶتتٸ.
«ونى پايدالانعىسى كەلەتٸندەرگە بٸز تيٸستٸ مٷمكٸندٸكتٸ بەرەمٸز. بۇل قىزمەت بٷگٸندە ايتارلىقتاي قىمبات. وسى ورايدا كەڭ جولاقتى ينتەرنەتپەن باسقا تەحنولوگييالار ەسەبٸنەن قامتۋدى ەسكەرٸپ وتىرمىز. دەگەنمەن تالشىقتى جەلٸ تارتىلۋى قيىنداۋ ەلدٸ مەكەندەر بار, ياعني بۇل اۋىلداردى تەك سپۋتنيكتٸك تەحنولوگييامەن قامتاماسىز ەتۋ مٷمكٸندٸگٸ بولادى», - دەدٸ اسقار جۇماعاليەۆ.
بۇدان بۇرىن حابارلانعانداي, مەجٸلٸستە اۋىلداردى كەڭ جولاقتى ينتەرنەتكە قوسۋدىڭ جوسپارى باياندالدى.
بەلگٸلٸ بولعانداي, جوعارىدا اتالعان جوبالاردى ورىنداۋ جۇمىستارىنىڭ نەتيجەسٸ بويىنشا 2022 جىلدىڭ سوڭىنا دەيٸن قازاقستان رەسپۋبليكاسى حالقىنىڭ 97 پايىزى كەڭ جولاقتى ينتەرنەت جەلٸسٸمەن قامتىلاتىن بولادى. قالعان 3 پايىزىنا سپۋتنيكتٸك تەحنولوگييانى قولدانۋ مٷمكٸندٸگٸ قامتاماسىز ەتٸلەدٸ.
