Búgin Jambyl oblysynyń ákimi Asqar Myrzahmetov Arys qalasyna arnaiy kelip, óńir shtabynyń jumysymen tanysty. Aimaq basshysy oblysqa tiesili 3-sektordaǵy qalany qalpyna keltirý sharalarynyń barysyn kózben kórip, 11 kósheniń belsendi turǵyndarymen kezdesti, dep habarlaidy "Ult aqparat".
Oblys ákimi atalmysh bólinistegi arystyqtardyń pikiri men oi-usynystaryna qulaq túrip, shtab músheleri men jumysshylarǵa jóndeý jumystaryn ýaqytyly ári sapaly atqarý kerektigin tapsyrdy. Óz kezeginde 3-sektor aýmaǵyndaǵy turǵyndar áýlieatalyq qurylysshylardyń jumysyna kóńili tolatynyn jetkizip, alǵys aitty.
Aita keteiik, búginde elimizdiń barlyq óńiri judyryqtai jumyla kirisken Arys qalasyn qalpyna keltirý jumysy qyzý júrip jatyr. Onyń ishinde jambyldyq qurylysshylardyń da belsendi eńbegin elep aitýǵa bolady. Oblysqa tiesili 3-sektordaǵy 50 turǵyn úidiń jóndeý jumystary tolyq aiaqtaldy. Paidalanýǵa berilgen bul úilerge qaita qonystanǵan halyq jambyldyqtarǵa dán riza.
Jambyl oblysyna qarasty bul bólinis qaladaǵy jarylys oryn alǵan aýmaqqa eń taiaý ornalasqandyqtan, apat kezinde ondaǵy úiler men nysandardyń 90 paiyzdan astamy búlingen.
Qazirgi tańda 3-sektor aýmaǵyndaǵy qalpyna keltirý sharalaryna jambyldyq 4 qurylys kompaniiasynan 450-den asa qurylysshy men 21 texnika jumyldyrylǵan. Olar 242 jeke turǵyn úi boiynsha jóndeý jumystaryn júrgizip jatyr.
Eske sala keteiik, Arys qalasyn qalpyna keltirýge baǵyttalǵan Jambyl oblysynyń shtabyna qarasty 3-sektorǵa 11 kóshe bekitilgen. Onda 312 jeke turǵyn úimen birge 14 áleýmettik jáne kommertsiialyq nysan bary anyqtalǵan. Zerdeleýden ótken jeke turǵyn úidiń barlyǵynyń aqaý aktileri toltyrylyp, smeta jumystary jasaldy.
Qiraǵan 3 úidiń ekeýi qaitadan salynyp, bireýi tolyq jańǵyrtylady. Qalǵan 309 úige ártúrli jóndeý jumystaryn júrgizý josparlanǵan. Qajetti qurylys materialdary kún saiyn jetkizilýde. Tiisti shyǵyndar respýblikalyq biýdjet pen arnaiy qorǵa jinaqtalǵan qarjydan qarastyrylýda.
