Búgin QR Premer-Ministriniń birinshi orynbasary Asqar Mamin resmi saparmen Túrkistan oblysyna keldi. Sapar barysynda óńir basshysy Janseiit Túimebaev Túrkistan qalasyndaǵy atqarylyp jatqan qurylys jumystarymen tanystyrdy, dep habarlaidy "QazAqparat".
Asqar Mamin bastaǵan jumysshy top aldymen jańadan salynyp jatqan Ákimshilik-iskerlik ortalyqta boldy. Búginde ondaǵy 48,4 gektar aýmaqqa birinshi kezekte salynýy tiis 13 nysandy iske asyrý úshin jer telimderi tolyǵymen bosatylǵan. Qazirgi tańda onda oblystyq ákimdik pen basqarmalardyń jáne departamentterdiń ǵimarattary salynyp jatyr. Budan soń Asqar Maminge 26 kópqabatty turǵyn úi men 88 kópqabatty turǵyn úidiń jáne saýda ortalyqtardyń qurylys jumystary tanystyryldy.
Aita keterligi, 1536 páterden turatyn baspananyń 1200 páteri (20 turǵyn úi) - arendalyq úiler, qalǵan 6 turǵyn úi, iaǵni 336 páter - kredittik baspana. Irgetasy osy jyldyń qyrkúiek aiynda qalanyp, memlekettik biýdjet esebinen salynyp jatqan 60 páterli 20 turǵyn úidiń 11-i (660 páter) osy jyldyń sáýir aiynda tapsyrylady. Qalǵan 6 turǵyn úi (540 páter) qurylysy qarasha aiynda bastalǵan-dy. Tapsyrylý merzimi keler jyldyń qarasha aiyna josparlanǵan. Jańadan boi kóteretin 88 turǵyn úidiń 44-i 2019 jyly paidalanýǵa berilse, qalǵan 44 úi 2020 jyly el igiligine tapsyrylady dep kútilýde.
Asqar Mamin bastaǵan jumysshy topty oblys ákimi Janseiit Túimebaev nysan basyna ózi alyp baryp, Túrkistanda boi kóteretin Qoja Ahmet Iasaýi mýzeiiniń qurylysymen tanystyrdy. Túrkistan qalasynyń rýhani-mádeni aimaǵynda «Samuryq-Qazyna» UÁQ» AQ tapsyrysymen Qoja Ahmet Iasaýi murajaiynyń nysany boi kóterýde. Aýmaǵy 3200 sharshy metrdi quraityn mýzeidiń qurylys jumystaryn aiaqtaý 2020 jyldyń sońyna qarai josparlanyp otyr. Birinshi vitse-premer qurylys jumystarymen tanysyp, jumysty qarqyndatýdy tapsyrdy.
Astanalyq jumysshy top aialdaǵan kelesi nysan - Áziret Sultan qoryq mýzeii boldy. Munda da qurylys qarqyn alyp, mádeni-tarihi Vizit ortalyǵy turǵyzylmaq.
Sapar sońynda Túrkistan men Qyzylorda oblysynyń óndiris oryndary óndiretin qurylys materialdary kórmesi ótti. Onda qysh, plita jabyndy syndy qurylysqa qajetti jabdyqtar qoiyldy.
