2019 jylǵy 11-12 shildede Qazaqstan Respýblikasynyń Premer-Ministri Asqar Mamin resmi saparmen Tájikstan Respýblikasyna (Dýshanbe q.) jáne Qyrǵyz Respýblikasyna (Bishkek q.) barady, dep habarlaidy primeminister.kz.
Dýshanbede Qazaqstan Premer-Ministri Asqar Maminniń jáne Tájikstan Premer-Ministri Kohir Rasýlzodanyń basshylyǵymen shaǵyn jáne keńeitilgen quramdardaǵy úkimettik kelissózder ótedi. Taraptar saýda-ekonomikalyq jáne tranzittik-kólik yntymaqtastyǵyn odan ári damytý, ónerkásiptik kooperatsiiadaǵy ózara is-qimyl, mádeni-gýmanitarlyq bailanystardy nyǵaitý máselelerin talqylaidy.
Bishkekte Qazaqstan-Qyrǵyz Úkimataralyq keńesiniń VIII otyrysy ótedi. Kún tártibinde saýda, investitsiialar, ónerkásip, kólik, munaigaz salasy, qorshaǵan ortany qorǵaý, mádeniet, týrizm, bilim berý, densaýlyq saqtaý, sý-energetika salasy, kedendik jáne shekaralyq ózara árekettestik salalaryndaǵy aǵymdaǵy jáne perspektivaly yntymaqtastyqtyń 18 máselesi qaralady.
Resmi saparlar aiasynda birqatar qujattarǵa qol qoiý kózdelgen.
