QR Premer-Ministri Asqar Mamin Ózbekstan Respýblikasynyń kólik ministri Ilhom Mahkamovpen kezdesti, dep habarlaidy "Ult aqparat" primeminister.kz-ke silteme jasap.
Taraptar tranzittik-kólik salasyndaǵy yntymaqtastyqty damytý perspektivalaryn, atap aitqanda, júk tasymalyn ulǵaitý, temirjol jáne avtomobil kóligin damytý, birlesken iri infraqurylymdyq jobalardy iske asyrý máselelerin talqylady.
Qazaqstannyń Ózbekstanmen strategiialyq seriktestigi tranzittik-kólik salasyn qosa alǵanda, barlyq baǵyttarda qarqyndy damyp keledi. Qazaqstan men Ózbekstan taraptary ózara saýda kólemin ulǵaitý úshin kólik-logistika áleýetti arttyrý boiynsha sharalar qabyldap jatyr.
2021 jylǵy qańtar-mamyrda taýar ainalymy 46%-ǵa ósip, $1,5 mlrd qurady. QR-nyń ÓR-ǵa eksporty 58,4%-ǵa ulǵaidy.
Pandemiiaǵa qaramastan, Qazaqstan men Ózbekstan arasynda júk tasymalynyń barlyq túrleri boiynsha kórsetkishterdiń artqany baiqalady.
Tek 2021 jyldyń I toqsanynda konteinerlik tasymaldar 2020 jyldyń sáikes kezeńimen salystyrǵanda 57% ósimmen 233,9 myń JFE-ge deiin artyp keledi. Avtomobil kóligimen júk tasymaldaý kólemi osy jyldyń 6 aiynda 18%-ǵa ósip, 1,3 mln tonnany qurady.
Taraptar biylǵy jyldyń 29 shildesinen bastap aptasyna 2 ret jiilikpen «Aqtóbe – Nókis» baǵyty boiynsha jańa áýe qatynasyn ashýǵa kelisti. Qazirgi ýaqytta QR men ÓR arasynda aptasyna 32 reis oryndalady.
Kezdesý barysynda taraptar birlesken iri infraqurylymdyq jobalardy iske asyrý — «Darbaza – Maqtaaral» jańa temirjol jelisin, «Túrkistan – Shymkent – Tashkent» joǵary jyldamdyqty magistralin salý jáne t. b. josparlardy talqylady.
