Qazaqstan Premer-Ministri Asqar Mamin Tashkent qalasynda ekijaqty yntymaqtastyq boiynsha Birlesken úkimetaralyq komissiia otyrysyna qatysyp, Ózbekstan Prezidenti Shavkat Mirzieevpen kezdesý ótkizdi, – dep habarlaidy primeminister.kz.
Kezdesý barysynda Qazaqstan men Ózbekstan arasyndaǵy ózara is-qimyldyń barlyq spektrleri boiynsha ekijaqty yntymaqtastyqty odan ári damytý máseleleri talqylandy.
«Qazaqstan Ózbekstanmen jan-jaqty ózara tiimdi bailanystardy keńeitýdi kózdeidi», — dep A. Mamin, buǵan Qazaqstannyń Tuńǵysh Prezidenti – Elbasy N. Nazarbaev pen Ózbekstan Prezidenti Sh. Mirzieev berik negizin qalaǵan, eki el arasyndaǵy sońǵy jyldary qalyptasqan shynaiy strategiialyq seriktestik yqpal etetinin atap ótti.
QR Prezidenti Q. Toqaevtyń 2019 jylǵy sáýirde Ózbekstanǵa jasaǵan memlekettik sapary barysynda Qazaqstan – Ózbekstan yntymaqtastyǵyna eleýli qarqyn bergen mańyzdy ýaǵdalastyqtarǵa qol jetkizildi.
«Bizdi yntymaqtastyqtyń barlyq baǵyttary, onyń ishinde saýda-ekonomikalyq saladaǵy baǵyttar boiynsha oń dinamika qýantady. Biz strategiialyq seriktestikti odan ári nyǵaitýǵa múddelimiz», — dedi ÓR Prezidenti Sh. Mirzieev.
QR Premer-Ministri kólik jáne tranzit, investitsiialyq yntymaqtastyq, aýyl sharýashylyǵy, energetika, qorǵanys-ónerkásiptik sala, tsifrlandyrý, týrizm, mádeni-gýmanitarlyq bailanystar salasyndaǵy zor perspektivalardy atap ótti.
Tashkentte Qazaqstan Premer-Ministri óziniń ózbek áriptesi A. Aripovpen QR men ÓR arasyndaǵy ekijaqty yntymaqtastyq boiynsha XVIII Birlesken úkimetaralyq komissiia otyrysyna qatysty.
Komissiia otyrysy eki eldiń memlekettik organdarynyń basshylary men biznes qaýymdastyqtary ókilderiniń qatysýymen ótti.
«Ózbekstan – Qazaqstannyń úshinshi saýda seriktesi», — dep QR Premer-Ministri, eki el arasyndaǵy saýda-ekonomikalyq yntymaqtastyqtyń qarqyndy damyp kele jatqanyn aitty.
Ózbekstan Úkimetiniń basshysy A. Aripov eki eldiń biznes qurylymdarynyń arasynda tikelei bailanys ornatýǵa múmkindik beretin alǵashqy QR jáne ÓR Aimaqaralyq forýmnyń jáne Ortalyq Aziia ekonomikalyq forýmynyń mańyzdylyǵyn atap ótti.
Belsendi damyp kele jatqan tyǵyz bailanystardyń kórsetkishi — QR men ÓR arasyndaǵy ózara saýdanyń ósýi: 2018 jyldyń qorytyndysy boiynsha taýar ainalymy $3 mlrd-qa jýyq mólsherge jetti. 2019 jylǵy qańtar-sáýir ailarynda ótken jyldyń sáikes kezeńimen salystyrǵanda 20,8%-ǵa artyp, $1,1 mlrd qurady.
Taraptar Úkimetaralyq komissiia qabyldaǵan sheshimder ekijaqty qarym-qatynastardy nyǵaitýǵa salmaqty úles qosyp, eki el ekonomikasyn damytý úshin jańa múmkindikter ashatynyna senim bildirdi.
Otyrysqa qatysýshylar 2018 jyly «Qazaqstandaǵy Ózbekstan jylynyń» tabysty ótkenin, sondai-aq 2019 jyly «Ózbekstandaǵy Qazaqstan jylyn» ótkizý boiynsha Is-sharalar josparyn sapaly oryndaýdyń mańyzdylyǵyn atap ótti.
Qazir Ózbekstanda qazaqstandyq kapitaldyń qatysýymen 600-ge jýyq birlesken kásiporyn jumys isteidi, Qazaqstanda ózbek kapitalynyń qatysýymen 1 myńnan astam kásiporyn bar, onyń ishinde 400-den astamy — birlesken kásiporyndar.
Úkimetaralyq komissiia jumysynyń qorytyndysy boiynsha jalpy somasy $1,5 mlrd-tan asatyn 27 qujatqa qol qoiyldy. Kelisimder saýda-ekonomikalyq, investitsiialyq, tranzittik-kólik, aýyl sharýashylyǵy salalarynda, jeńil ónerkásipte, farmatsevtikada yntymaqtastyqty damytýǵa baǵyttalǵan.
Otyrys qorytyndysy boiynsha Birlesken Úkimetaralyq komissiianyń teń tóraǵalary Qazaqstan Premer-Ministri A. Mamin men Ózbekstan Premer-Ministri A. Aripov tiisti Hattamaǵa qol qoidy.
